Dr Thangtea'n kawng siam dan tur enfiah

Minister Dr R Lal­thangliana chuan nimin khan khan a bial South Tuipui chhung, Hnah­thiala BCM Kanan biak-in bula NH-54 kawngpui tlahniam a tlawh a, siam-

ṭhat thuai a nih theih dan tur a enfiah.

Lei tlahniam vang hian NH-54 kawngpuiah hian June 12, 2018 aṭang­in lirthei lian tlan tlang theih a ni lo.

Dr R Lalthangliana chuan, kawngpui chu Hnahthial leh a chhehvel tan chauh ni lo, Mizoram chhim lam tan châk lâkna leh inkalpawhna kawngpui pawimawh tak a nih thu a sawi a, "Dan pangngai anga lirthei hrang hrangte'n ṭha taka an zawh leh theihna turin engineer-te'n ruahmanna an lo siam tawh hi chak takin bawhzui a ni ang," a ti.

Lei min leh tlahniam vanga kawngpui chhia chu ft. 150 chuang a ni a, June 11, 2018 khan a khì tih hriat niin, July 6, 2018-ah nasa takin a chê a; inchi 14 velin a tla hniam a, tunah chuan inchi 35 velin a tawlh tawh a ni.

Kawng chhan nan PWD engineer-te chuan bailey bridge dawh leh check dam siam turin ruahmanna siam a nih thu an sawi a; kawngpui chhak lei tawlh hlauh­awm taka awm mek ven nan retaining wall siam ngai an tih thu an sawi bawk.