NGO Coordination Committee (Joint NGO)-in Mizoram chief electoral officer (CEO) SB Shashank chu nimin tlai ni tlak hma ngeiin Mizoram chhuahsan turin phût mah se, SB Shashank hian Mizoram a chhuahsan lo. Hei vang hian Joint NGO chuan vawiin hian Aizawlah 'Hnam hnatlang' a ko a, Mizo mipuite Raj Bhavan hmar lam gate bula CEO pisa kawtah kal khawm turin a chah.
YMA, MUP, MHIP, MZP leh MSU-te telna Joint NGO hruaitute hi nimin khan chief secretary Arvind Ray-a'n CS conference-ah a kâwm a; ṭha takin inkâwm mah se, a hmaa thu lo dah tawhah thutlukna sawhsawn a awm lo.
CEO SB Shashank-a'n Joint NGO phût anga Mizoram chhuahsan a tum loh avang leh, tun thlenga Mizorama a la awm avangin Joint NGO chuan nimin khan thuchhuah a siam nghal a; November 28, 2018-a Mizoram inthlanpui awm tura SB Shashank, CEO-in inthlan a buatsaih dan leh a kalpui dan a duh lohna entir nan vawiin Thawhlehni zing dar 8 aṭangin 'Hnam hnatlang' koh a nih thu an tarlang.
Joint NGO chuan, hnam hnatlang chu Raj Bhavan hmar lam gate bula CEO pisa kawtah neih tur a nih thu tarlangin, "Mizo mipui a tam thei ang ber kal turin kan ngen a ni," an ti.
NGO Coordinatioon Committee chuan, CEO Shashank-a thupek anga phai lam aṭanga paramilitary force phurh luhna tura Mizo commercial vehicle hman a ni chu ṭha an tih loh thu sawiin, ram leh hnam humhalh nana an motor-te hmantir lo turin association hruaitute an ngen.
Joint NGO chuan, Federation of Mizoram Govt. Employees and Workers-te pawh NGO hmalakna thlawp a, Shashank-a a chhuah hma chu an hna thawk lo turin an ngen a, "Mizoram mipui leh kohhran zawng zawngte pawh hnam dam nana ṭawngṭai turin kan ngen bawk a ni," an ti.
Joint NGO hmalakna leh CEO Shashank chungchangah hian Aizawl DC Dr A Muthamma chuan November 4, Pathianni tlai khan Mizoram Kohhran Hruaitute Committee (MKHC) chairman Rev. F Lalrinnunga, Synod moderartor chu a quarters-ah a lên chilh a, Mizoram boruak tawn mekah inrawlh turin MKHC a ngen.
MKHC hruaitute chu nimin zinga an meeting hmasak hnuah, nimin chawhnu dar 1 khan chief secretary Arvind Ray leh Mizoram sorkar hotu dangte nen CS conference hall-ah an inkawm a; boruak muanawm a awm theih nan leh a ṭha zawnga thil a kal theih nana hma la turin CS chuan MKHC hruaitute a ngen.
Inkawmnaah hian MKHC hruaitute an tel kim thawkhat a, sorkar aṭangin Home secretary Lalrinliana Fanai, DGP Balaji Srivastava, Home addl. secretary Lalbiakzama leh hotu dangte an tel.
MKHC hruaitute hi nimin tlai khan Central YMA pisa-ah Jt. NGO hruaitute nen an inkâwm leh a, CEO chhuak tura an ngenna ECI-in an chhan hun leh Bru-te vote thlakna hmun tur tihchian hun nghak a, Hnam Hnatlang an tum chu ṭhulh hrilh turin an ngen a ni.
Jt. NGO hruaitute chuan Hnam Hnatlang chu buaina siam lo zawng, ralmuang taka neih an tum thu an lo hrilh.
MKHC hruaituite nen a inkawm zawh hian Jt. NGO hruaitute chuan MKHC thu thlen hi an ngaihtuah leh a, ruahmanna an lo siam tawh anga Hnam Hnatlang kaltlangpui an rel a ni.
Common candidate tintuah
Hachhek NGO Co-ordination Committee chu vawiin khan an ṭhukhawm a, kumin MLA inthlanah Hachhek bialah Bru candidate an awm a nih chuan candidate inṭawm (common candidate) neih an rel.
Hachhek NGO Co-ordination Committee hruaitute hnen aṭanga thudawn danin, MLA inthlanah hian BJP chuan candidate atana Bru dah an tum tih thawm a awm avangin common candidate neih hi an rel a, an candidate tur erawh an la tifel lo. Bru candidate an awm lo anih chuan common candidate hi an siam dawn lo.
Nizan khan Hachhek NGO Co-ordination Committee hruaitute chuan Hachhek bial chhunga political party hruaitute an thurel chungchang hi an sawipui a, he thuziah lai hian an thutlukna kan hre hman lo.
