Mizo IAS-te'n CEO thil tih dan dik lo an ti

Mizoram chief secre­tary hlui Lalfakzuala, IAS (Rtd) chuan, Mizoram chief electoral officer (CEO) SB Shashank-a'n Mizo­ram inthlana duty tura cen­tral armed police force (CAPF) a chah luh dan chu sorkar kalphung dik lo a nih thu a sawi a; Mizoram Home secretary hlui Rin Sanga, IAS (Rtd.) pawhin state chhunga law & order leh security chu state list a nih thu a sawi.

ZPM Val Upa Council (VUC) hotute'n nimina Aizawl Press Club-a thu­­thar thehdarhtute an kawmnaah zawhna chhangin ZPM VUC chair­man Lalfakzuala, Mizoram chief secretary hlui chuan, Bru-te chu sorkar laipuiin an duat sual nia a hriat thu a sawi a, "An awmna camp-a vote thlaktir leh an tumna hi chu a dik kan ti lo hulhual. CEO hmalakna hi ṭha kan ti lo a, NGO kan thláwp," a ti.

CEO SB Shashank-a'n CAPF a chah luh dan chu a dik lo tih sawiin, "State dinhmun hre chiangtu chu Home department an ni a, inthlana police mamawh zat hretu pawh an ni. Police mam,awh zat an chhut a, Mizoram police-in an daih bak chu CAPF an dil ṭhin. State sorkar ráwn loa CEO-in CAPF company 40 lai a lo dil hi a âwm lo a, kalphung dik a ni lo," a ti a; a hriat chinah, tun hmain Mizoram inthlanah CAPF company 20 aia tam chah luh a awm a la hriat loh thu a sawi.

ZPM VUC member Rin Sanga, IAS (Rtd.) pawhin kum 1989 velah Mizoram sorkarah Home secretary a nih thu sawiin, chutih lai chuan Mizoram chu President's Rule-ah a awm a, Presudent's Rule aṭangin state assembly inthlan an hmachhawn tih a sawi a, "President's Rule aṭanga Assembly inthlan kan hmachhawn dawn khan security lam mamawhte chu Delhi-ah keimahni ngeiin kan sawi fel a, CEO a inrawlh lo," a ti.

Rin Sanga sawi danin, Mizoram President's Rule-a a awmna aṭanga kum 1989-a Assembly inthlan an buatsaih dawn­ah venhimna lama duty tur mamawh zat an chhût a, chu chu sorkar laipuiah Home department-in an thlan a ni. Rin Sanga chuan, "CEO a tel lo. CEO-in a tih theih chu an mamawh zat state sorkara thlen a ni a, an rawt angin state sorkarin Ministry of Home Affiars-ah a dil ṭhin," a ti.

Rin Sanga chuan, "Law & order hi state sub­ject a ni hrim hrim a, tuna Mizoram CEO thil tih dan hi a pawmawm lo hrim hrim a ni," a ti bawk.