CEO press conference-ah Aizawla media-te an kal lo

Chief electoral officer SB Shashank chuan nimin chawhma dar 10 khan a pisaah press conference a ko a; mahse, Mizoram Journalists' Association (MJA) thutlukna angin Aizawla press mite an tel lo a, sorkar media tlem azawng an tel.

MJA Gen. Hqrs. chuan thuchhuah siamin, Mizoram CEO press conference-a an tel loh chhan an tarlang a; Mizo mipuite rilru tina zawnga CEO SB Shashank-a'n hma a la chu pawi an tih thu an sawi.

MJA chuan, CEO hi Election Commission of India (ECI) hnena Home secretary Lalnunmawia Chuaungo a hêkna, national paper-a tarlan chungchang zawhfiah tumin ṭum eng emaw zat MJA member-te'n hmuh an tum thu tarlangin, "Chhuanlam chi hrang hrang siamin tumah a hmu duh lo," an ti.

SB Shashank-a'n a duhthusam ang ngeia ECI-in Lalnunmawia Chuaungo chunga action a lak hnuah, a hma zawnga a hmuh duh loh tualchhung media-te chawpchilh taka ko a, press conference a nei leh si nia sawiin MJA chuan, "Journalist-te tham loh­naah kan ngai," an ti a; CEO insawithiamna ringawt ngaithla tura kal chu ṭul an tih loh thu a tarlang a ni.