Seat 26-30 kan la ang - Ronald Sapa
Mizoram aṭanga Rajya Sabha MP Ronald Sapa Tlau chuan nimin khan Aijal Club-ah thuthar thehdarhtute a kâwm a; Mizoram Legislative Assembly inthlanpui awm turah Congress party-in seat 26-30 inkar an lak an beisei thu a sawi.
Zawhna chhangin Ronald Sapa Tlau chuan, tuna Mizorama BJP-te chu Congress party-in an hlau lo tih a sawi rualin, "Khu lam aṭanga an chet dan leh thil tum avangin BJP hi an hlauhawm a ni. BJP hi pawisa tihthih (demonetisation) hnuah khawvela political party hausa ber lawr lak an ni," a ti.
India hmarchhaka Kristian state dang - Meghalaya leh Nagaland-a BJP chêt dun dan enin, Mizoramah pawh hmanraw ṭha lo tak an hmang hreh dawn lo nia sawiin Ronald Sapa chuan, "An sum hmatheh hi Mizo mipuite'n kan hnâwl ngam a ngai," a ti a; BJP chuan India ram chu thlak a, Hindustan-a din an tum thu leh secularism chu hnawk an tih thu a sawi.
Ronald Sapa Tlau chuan, BJP leh MNF party-te chuan an thawhho loh thu sawi ṭhin mah se, an chêt dan enin a rûkin an thawkho ngei tih a chiang niin a sawi a, "A ruala an thawhho loh thu an puang hian an thawhhozia a tichiang zawk. BJP nena inzawm duhtu MNF President hian BJP kaihbû-a ṭan mai loh chu hmabak a nei lo," a ti.
Zawhna chhangin Ronald Sapa chuan, Aizawl/Lengpuia thlawk thlawhna chuan man hmun dang aiin a to bik nia sawi chungchang chu Union Civil Aviation Minister hnenah a thlen tawh ṭhin niin a sawi a; airlines dang rawn lut se, thlawhna chuan man a hniam phah mai theih thu a sawi rualin, hmalak chak a har thu a sawi bawk.