MLA inthlan atan inbuatsaih zel

November 28, 2018-a MLA inthlanpui awm tur atan Mizoram hmun hrang hrangah inbuatsaihna kalhpui zel a ni.

Siahaah chuan in­thlanna thianghlim leh felfai a awm theihna atan nimin khan DC Zoeng­sanga'n a pisaah political party hrang hrang hruaitute a kâwm a; district dangte entawn tlaka inthlanna muanawm leh felfai an nei theihna atan official-te leh political party-te an ṭanho a ngaih thu sawiin, "Election Commission of India-in inthlanna thianghlim leh felfai a awm theihna atana dan leh dûn felfai takin i zâwm ang u," a ti.

Sorkar official-te'n an tih tur ṭha taka an tih tur thu sawiin Zoengsanga chuan, "Political party tinte pawhin Kristian rilru dik tak puin, Isua nen tihin kan hma lawka MLA inthlanna lo awm tur hi i hmachhawn ang u," a ti a; an district chu district dangte entawn tlak an nih theihna atan political party-te chu thawhpuiah a sáwm.

Political party-te hi inthlan laia an tih tur leh tih loh tur hrilhhriat an ni a, hriatfiah duh an neihte chu election official-te'n an chhang.

Aizawlah pawh nimin khan Assembly Annexe conference hall-ah deputy CEO H Lianzela hoin ‘Exchange of Postal Ballot Papers’ hun hman ṭan a ni.