CM Hawla'n Prime Minister leh Home Minister CEO SB Shashank sawn chhuak turin a ngen

Chief minister Lal Thanhawla chuan Pathianni leh nimin khan prime minister Narendra Modi, leh Union Home minister Rajnath Singh hnenah lehkhathawnin, CEO SB Shashank sawn chhuak turin a ngen.

SB Shashank chuan a hna­thawhpuite pawh a thurualpui thei lo tih tarlangin CM Hawla chuan, "Inrintawkna pawh a nei lo. A chet dan en hian, tlawmngai pawlte thil tih apiang chu a ngai pawimawh duh lo a ni. Tluang tak leh ṭha taka inthlan a awm theihna awm chhun chu CEO aṭanga SB Shashank sawn chhuah a ni. CEO thar inruat nghal mai a rem lo a nih pawhin Addl. CEO hnenah charge a hlan thei tho a ni," a ti.

Mizoramah inthlanna thiang­hlim leh felfai tak a awm ṭhin thu tarlangin Chief Minister chuan, "Hei hi a chhan chu tlawmngai pawlte vang a ni. Tun ṭumah hian experience nei lo CEO chuan ECI-te action na tak a lak tir a ni," a ti a, tun ṭuma ECI action lak dan aia na hi Mizoram inthlan lo awm tawhah a la hmuh ngai loh thu a sawi.

Lal Thanhawla chuan ECI action lak dan chu tlawmngai pawlin an pawm zam thei lo tih tarlangin, "Mizoram sorkar pawhin tlawmngai pawlte thil phut Tripura transit camp-a awmte Mizoram chhunga ngeia vote thlak tir hi kan thlawp tlat a ni," a ti a, Bru-te chuan Mizorama awm lo Mizote'n vote an thlak dana vote an thlak ve tur a nih thu a tarlang.

Chief Minister chuan Bru-te'n Mizoramah ngei vote an thlak theihna atan sorkar laipui leh state sorkar chuan ruahmanna an siam tih tarlangin, "Tripura camp-a mahni hamṭhatna duhte'n Mizorama kir turte hi an dang mai mai a ni. A chhan pawh Auto­nomous District Council an phut vang a ni a, an hmin a ni," a ti.

Mizote hi hun engemawchen tlawh pawh loa kan awm hnuah, India state dangte ang thoa India mi kan ni tih inpawm an tum mek tih sawiin CM Hawla chuan, "Tun anga thil kal hi chuan Mizo rilru a tihnat ka hlau," a ti a, ECI chetlakna hnuhnung ber chuan sorkar laipuiin Act East Policy a kalpui a tum thlenga nghawng a neih a hlauh thu a tarlang.

Mizoram BJP president Dr. JV Hluna pawhin nimin khan prime minister Narendra Modi hnenah lehkhathawnin, ECI-te chu Lok Sabha MP inthlan dawna Tripura-a Bru-te chu an camp-a vote thlak tir tawh lo tura an intiam thu tarlangin, "Bru-te chu Mizorama vote thlak tura beisei an ni a, an camp-a vote thlak tura ruahmanna siam kan duh lo," a ti.

Dr. JV Hluna chuan hun kal tawh thlirin Mizoram chuan inthlanna muanawm a nei ṭhin tih tarlangin, "Security force chah luh vak hi a ngai loa, ṭum dangah pawh an ti ngai lo. Hemi chungchang hi Home department chuan CEO sawifiah turin an ti a, a sawifiah lo," a ti a, CEO chhuahtir tura Mizo mipuite kan ṭanrual thu a tarlang.