ZPM VUC-in ZPM fiah turin mipui an ngen

Zoram Peoples' Movement (ZPM) Val Upa Council (VUC) chairman Lalfakzuala chuan, Mizoramah party pahnihte'n kum 30 chuang ro an rel tawhah ram leh mipui tana an tih theih tâwk an ti tawh a, an thlen phak tâwk an thleng tawh tih a sawi a; ZPM chuan kalphung thar nei mipui sorkar dinin, tih tak zeta mipui hamṭhatna tura thawh an tum thu sawiin, ZPM chu fiah turin Zoram mipui a ngen.

ZPM VUC hian nimin khan Aizawl Press Club-ah thuthar thehdarhtute an kâwm a; Lalfakzuala chuan, mi tu pawhin dîptu awm loa thuneihna a kawl chuan a inluling ṭhin tih sawiin, "Hei hi mihring mizia a ni a, dîptu, khalh ngiltu leh a ṭul anga khaktu leh thurawn petu kan mamawh. Hei vang hian ZPM chuan VUC a din a, VUC hi pawl leh sorkar uaptu leh khalh ngiltu, thurawn petu leh sorkar ruangám dintu tur a ni.

Lalfakzuala chuan, VUC chuan ṭul nia a hriat angin pawl hruaitute hnenah thuràwn a pe tih sawiin, "Chief Minister candidate ruatin, democracy kalphung dik tak zâwma team leader anga thawk tur leh ZPM thuthlung vuan tlat turin thu a tiamtir a, MLA candidate-te puangin rinawmna thu a tiamtir a ni," a ti a; ZPM chuan BJP nena thawhho an remti ngai dawn lo tih a sawi.

ZPM VUC Chairman chuan, ram leh hnam himna leh damna an ngai pawimawh tih sawiin, "Ram dang mite chungchanga YMA leh tlawmngai pawl dang­te hmalakna hi ZPM chuan a ­thláwp tlat a, ZPM a sorkar chuan hemi kawngah hian chak takin hma a la dawn a ni," a ti.

Mizoram Chief Electoral Officer (CEO) SB Shashank chungchanga NGO Coordination Committee hmalakna an thlawp thu sawiin Lalfakzuala chuan, "CEO hi thlak ni se, a fel maiin kan ring," a ti a; buaina chinfel kawngah fimkhur tak leh lungrual taka tharum thawh loa kal ṭul an tih thu a sawi. "Sorkar laipuiin Mizoram hi President's Rule-a min dah a chak hlein kan hria," tiin, President's Rule-a an dahna tur remchang siamsak loh a ṭul thu a sawi.

Lalfakzuala chuan, ramri chungchangah party lian pahnih­te chu Memorundum of Settlement-ah an lo inziak âwk tawh a, hma la thei dinhmunah an ding tawh lo niin a sawi a, "ZPM chauh hi awmze neia hma la thei tur a ni. ZPM a sorkar chuan tuna Assamin an enkawl Mizoram chhunga mi Inner Line Reserved Forest hi la kîr vat turin hmalak a ni ang," a ti.

ZPM Vice Chairman chuan, mi ṭhenkhatin ZPM policy, sawhthing leh hmunphiah lei chu thil tih theih loh angin sawi mah se, ZPM a sorkar chuan an lei ngei dawn tih a sawi bawk.