MLA aṭangin Hiphei a báng, BJP a zawm

Indian National Congress (INC) ticket-a Palak bial aṭanga MLA atana thlan tlin Hiphei, Assembly speaker chuan nimin khan MLA aṭanga a bànna lehkha, deputy speaker R Lalrinawma hnenah a thehlut. Chumi hnuah MPCC hruaitute hnenah Congress party aṭanga bànna a thehlut leh a, BJP a zawm nghal.

Hiphei hian nimin khan Aizawl Press Club-ah thuthar thehdarhtute a kâwm nghal a; BJP chu sakhaw tih bik nei lo a nihzia a taka hmutu a nih avangin BJP a zawm tih a sawi a, "Congress party-in BJP nen a rûka inzawm anga min puhna, ka in min leisak aṭang tawha inzawm nia min puhna hi dâwt a ni. Min duhsak lotute'n Congress chhungkuaa hmai phih faina atana an min puhna mai mai a ni," a ti.

India ram hmun ṭhenkhata Congress tlakchhiatna ang chu Mizoramah a thleng ve dawn nia sawiin Hiphei chuan, "Congress hi ka hmangaih a, hmangaihte berin min pawm tawh loh avangin hmangaihtu dang ka zawng ve a ni," a ti a; BJP chu a belhchian hnuah belh tlak a ni tih a hmuh thu a sawi.

Tun hmaa Congress-in BJP an puhchhiatna ang chu BJP kum nga an sorkar chhungin hmuh tur a awm lo nia sawiin Hiphei chuan, "Kristianna leh Hindutva vanga buaina leh Constitution kal pêla an chetna pakhatmah ka hmu lo. Pu Himanta Biswa Sarma, Mizoram Election incharge mi taima, mi hrât khawkhéng, inngaitlawm leh ram tana inpe, Congress hun lai pawha kan thluak búr a ni a, aniin duhsak takin min sáwm a ni," a ti.