Mahni hmasial vanga bángah Hiphei puh
Congress party chuan thuchhuah siamin, Congress party aṭanga Palak bialtu MLA Hiphei a bàn chhan chu mahni hmasial vang niin an tarlang. Hiphei chu Congress pary-ah hun rei tak chhung an thawhpui tawh a nih thu sawiin, "Kan uiin, ama duh thu ngeia a kal zelnaah duhsakna kan hlan a ni," an ti.
MPCC Media department thuchhuah chuan, Hiphei-a'n Congress party aṭanga a bànna lehkhaah a bàn chhan a ziak lo tih sawiin, "Kristiante tana political party nèlawm loh ber BJP-ah a lut tur leh BJP-te'n a theih dan kawng apianga Mizorama sorkarna chan tuma an beihnaa a tel ve tur hi mak kan ti hle. Pu Hipheia’n Congress a bànsan chhan hi ram leh hnam leh mipui hmangaihna vang ni loin, ama hma a sial vang liau liau a ni," tiin a tarlang.
MPCC tarlan danin, Hiphei hian Mizoram inthlan turah Palak biala INC candidate nih leh a beisei a, theihtawp a chhuah. Palak biala Congress hruaitute leh mipui chu amahah an lungrual lo a; a ṭhenin Hiphei an duh a, a ṭhenin K Riachho an duh a, KT Rokhaw duh an awm bawk. Hiphei leh K Riachho bûk a nih hnuah, anmahni thlawptute aṭanga nawrna na tak a awm ve ve avangin, Palak biala INC candidate atan KT Rokhaw, MLA hlui ruat a ni ta a ni.
Hipheia'n INC candidate a chang dawn lo tih a hriat atangin MLA candidate a nih ngei theih nan BJP a dawr nia sawiin MPCC chuan, "Kan hriat dan chuan Palak bialah BJP a ni ang a, a tlin loh chuan state governor nih a phût a ni," an ti.