Mamit DC pisaa Election Branch-a thawk mi pali, August 10, 2018-a Tripura Bru relief camp-a kal tumte chu Zawlnuamah YMA leh MZP-te'n an dang. Bru camp-ah hian a rûkin electoral roll ennawnna tur lehkha pawimawh sem a ni a; Bru hruai kîr ṭan hun tur sawn hlat a ni bawk.

Tripura relief camp-a Bru-te hi August 14, 2018-a hruai kîr ṭan tura tih an ni a; ruahmanna engkim peih ni tawh mah se, Ministry of Home Affairs (MHA) thu angin, hruai kîr hna hi August 25, 2018-ah ṭan a ni dawn.

Home department hotute hnen aṭanga thu dawn danin, MHA-in Bru lâk lêt ṭan hun atan August 25, 2018 a ruat a, chumi hma chuan relief camp-a Bru-te chu Mizorama an kîr duh leh duh loh zawh chian a ni ang.

Bru camp-a kal tur Mamita Election Branch staff-te dan chungchangah Langkaih Group YMA president J Malsawma sawi danin, Election staff-te chu lirthei pahnih hmangin Tripura Bru camp an pan a, Zawlnuam an thlenin Langkaih Group YMA, Taitesena Group YMA leh Zawlnuama MZP hruaitute'n an lo dang a ni.

YMA leh MZP hruaitute chuan, inthlan kaihhnawih thil reng reng Tripura Bru camp-a tih chu NGO Coordination Committee leh political party hrang hrangte'n an duh lo tih an hrilh a; DC office staff-te pawhin kal luih tum loin, Mamit lamah an lêt leh a ni.

Central YMA president Vanlalruata, Joint NGO chairman ni bawk chuan August 10 tlai khan Zawlnuam a tlawh a; YMA leh tlawmngai pawl dangte chu Joint NGO thutlukna lo siam tawh kenkawh zui zel a ṭul thu a hrilh.

CYMA President chuan, Election Commission of India (ECI)-in Tripura Bru camp-a electoral roll ennawnna nei leh turin August 1, 2018-ah Mizoram sorkar a hriattir tih sawiin, chumi chungchang chu August 8-ah Home minister R Lalzirliana kaihhruaiin Home department hotu te, political party leh NGO hruaitute'n an sawiho tih a sawi.

Vanlalruata chuan, August 8-a Home Minister hoa inbiakràwnna neih hmain ECI thu bawhzuiin mi ṭhenkhatin Tripura Bru camp-ah thil an tih duhte an lo ti ṭan daih tawh tih hriat a nih thu sawiin, chu chu Mizoram sorkar hriatpui loha tih a ni em tih chu an zawhna niin a sawi a; Bru camp-ah electoral roll ennawnnaa inthun thar dilna leh thil tihdanglam dilna form 6, 7 leh 8-te a rûka sem a ni chu an hriatthiam loh thu a sawi bawk.

Thu dawn danin, Tripura-a Bru camp parukah hian August thla chawlhkar hmasa ber khan ECI thupek angin, Mamit, Kolasib leh Lungleia Election department-e thawktute'n electoral roll ennawnna tura lehkha pawimawh, Form-6 an sem a; Form-6 hi vote la nei lote electoral roll-a thun dilna leh voter constituency danga insawn dilna form a ni.

Hetih lai hian, Mizoram sorkar chuan July 12, 2018 khan Bru camp-ah electoral roll ennawn loh leh Mizorama hruai kîr chauh roll ennawnna neih turin thutlukna an lo siam tawh. Chutih laiin, ECI chuan August 1 khan Bru camp paruka electoral roll ennawn turin Mizoram sorkar a hriattir a ni.