Aizawlah e-Court project hawng

Langtlang zawka Court kalpui theihna tur leh awlsam zawka thubuai ngaihtuah tawh leh kal lai mek thlen chin hriat theihna tura hmalakna, e-Court project chu August 10, 2018 khan Gauhati High Court judge Justice Michael Zothankhuma'n Aizawl District Court buidling-ah a hawng. e-Court project atan hian district tinah hmanraw pawimawh tak tak lei a ni bawk.

Justice Michael Zothankhuma chuan, tunlaia information & technology (IT) ṭhang zelah Court-in IT thiamna hmang ṭangkaiin hma a sawn ve zel tih sawiin, "Paperless Court nei turin hmasawnna a kal mek zel a ni," a ti a; e-Court hnuaia Kiosk khawl hawn tak chu Court dàwrtu mipui leh ukilte tan ṭangkai tak a nih a beisei thu a sawi.

e-Court project atan hian cheng nuai 600 ruahman a ni a, a hnuaiah hian Kiosk leh Individual Court Public Information Display system duan a ni. Kiosk khawl pariat dah a ni a; Kiosk khawl hmangin Aizawl District Court hnuaia judge awm zawng zawngte Court-a thubuai awm mek te, a thlen chin te, ukil dingte leh thubuai ngaihtuah hun turte a en theih dawn a ni.

Kiosk khawl hi Court building first floor-ah dah a ni a, mahniin thubuai chungchang hmeh chhuaha en mai theih a ni. Individual Court Public Information Display chu Mizoram tan bika siam a ni a, Court chhunga luh kher ngai loin thubuai ngaihtuah leh mipuite hriattur tarlan ṭhin a ni ang.