Vanglaini logo

MIMER-ah zirlai 87-in admission an ti tawh

Mizoram Institute of Medical Education and Research (MIMER) hawn tûk, August 8, 2018-ah MBBS zir thar tur admission ti tawhte chu orientation class neihpui ṭan an ni. MBBS seat 100 awmna MIMER-ah hian zirlai 87-in admission an ti tawh.

MIMER-ah hian MBBS seat 100 awm zinga 70 chu Mizoram quota a ni a, Non Resident Indians (NRI) leh all India quota seat 15 ve ve a awm bawk.

MIMER registrar Dr Jane Ralte-in Vanglaini palai zawhna chhanga a sawi danin, tun dinhmunah zirlai 87-in admission an ti tawh a, seat 13 a la âwl.

Dr Jane Ralte sawi danin, Mizoram quota seat 70 zinga 62 chu hnawhkhah a ni tawh a, seat pariat a la ruak. All India quota seat 15 zinga 11 hnawhkhah ni tawhin, seat pali a la âwl a; NRI quota seat 15 zinga 14 hnawhkhah tawh niin, seat pakhat a la ruak a ni.

Hetih lai hian, Gauhati High Court-in The Mizoram (Selection of Candidates for Higher Technical Courses) Rules, 2016 chu hman rih loh turin August 9, 2018-ah a dah (stay) leh avangin Higher & Technical Education (HTE) department-a Technical Wing-in Mizoram quota-a medical course hrang hrang zir tur a thlanna chu kalpui zui theih a ni lo.

Hei vang hian MIMER-ah pawh Mizoram quota-a seat la ruak pariat chu hnawhkhah mai theih a ni rih dawn lo nia thu dawn a ni.

MIMER-ah hian August 2018 chhung admmission hawn a ni dawn a; August thla tawp lamah class pangngai ṭan tum a ni. A kum khatnaah hian subject pathum - Anatomy, Physiology leh Bio­chemistry-te a awm dawn a; a kum hnihna aṭangin subject panga - Microbiology, Pathology, Pharmacology, Forensic Medicine and Toxicology leh Community Medicine-te a awm ang.

MIMER-ah hian teaching faculty 79 leh non-teaching faculty 12 awm tawhin, an vaiin mi 91 an ni a, hei hi faculty post awm aṭanga 75% vel a ni; faculty-te hi professor, associate professor, assistant professor, demonstrator, senior resident leh junior resident-te an ni. Faculty atana thlan, appointment pek tawh zingah zawm lo te, zawm tawh hnua báng lehte an awm a ni.

MIMER hi College Wing leh Hospital Wing-ah ṭhen a ni. College Wing-ah academic buil­ding - administrative office, Depart­ment of Biochemistry (practical laboratory panga), zirlai 50 lenna demonstration room, faculty room leh library-te a awm. Anatomy building-ah faculty room, demonstration room, dissection hall, museum leh histo-pathology laboratory leh lecture theatre pahnih a awm a; zirlai 100 awmna tur hostel quarters siam a ni bawk.

Hospital Wing-ah khum 250 a awm mek a, chu chu State Referral Hospital a ni. Clinical department - General Medicine, Paediatrics, Tuberculosis & Respiratory Disea­ses, Dermatology,Venereology & Leprosy, Psychiatry, General Sur­gery (including Pediatric Surgery), Orthopedics, Ophthal­mology, Oto-rhino-laryngology (ENT), Physical Medicine & Rehabilitation leh Dentistry-te a awm.

Central Laboratory-ah patho­logical, biochemical leh micro­biological investigation a tih theih vek a; khum 10 awmna Emergency department & Casualty, major operation theatre pali leh minor operation theatre pahnih, endoscopy unit, bronchoscopy unit leh dialysis unit-te awm. Intensive care unit (ICU) khum 20 awmna leh blood bank siam mek a ni.

Radiology department ah x-ray khawl pali leh ultrasound khawl pahnih a awm a, khawl dangte lei mek a ni bawk.

MIMER Faculty
Professor - 4
Associate Professor - 4
Assistant Professor - 31
Senior Resident - 10
Demonstrator - 14
Junior Resident - 17

MIMER kalkawng
1) Kum 2008-ah Mizoram sorkarin hma a la ṭan.
2) MIMER behchhan State Referral Hospital-a khum 50 awm ṭhin chu December 10, 2012-ah khum 150-ah tihpun a ni.
3) April 2013-ah sorkar laipuiah DPR thehluh ni mah se, hnâwl a ni.
4) June 9, 2013-ah a hming atan Mizoram Institute of Medical Education & Research tih thlan a ni.
5) January 17, 2014-ah DPR thar thehluh nawn a ni.
6) State Referral Hospital chu February 12, 2016-ah khum 300 awmna turin tihlen a ni.
7) Establishment of New Medical Colleges attached with existing District/Referral Hospitals hnuaiah sorkar laipui leh Mizoram sorkarin May 16, 2014-ah thuthlung (MoU) an ziak. Scheme hnuaiah State Referral Hospital tihchangtlun nan cheng vbc. 189 hmuh a ni.
8) June 25, 2015-ah consultancy agency atan HSCC India rawih a ni.
9) Kum 2014-ah medical college, MBBS seat 50 awmna tur din dilna hmasa ber Medical Council of India (MCI)-ah thehluh a ni a, hnâwl a ni.
10) MBBS seat 100 awmna turin kum 2015-ah dilna vawi hnihna thehluh leh a ni a, hnâwl leh a ni.
11) A vawi thum nan July 5, 2016-ah dilna thehluh leh a ni a, MCI-in January 5-6, 2017 chhunga an endik hnuah an pawm lo.
12) July 5, 2017-ah a vawi lina atan dilna thehluh leh a ni.
13) MIMER director turin October 27, 2017-ah Dr Lallukhum Fimate appointment pek a ni.
14) MCI-in a vawi hnih nan November 21-22, 2017 chhungin State Referral Hospital an endik.
15) December 21, 2017-ah MIMER atan post siam thar 409 hnawhkhah Mizoram sorkarin a phalsak.
16) MPSC leh Health department hotute'n February 27-28, 2018 chhungin Guwahati-ah interview an nei a; faculty tur eng emaw zat lak a ni.
17) MCI-in April 4, 2018-ah a vawi thum nan State Referral Hospital an endik.
18) MCI-in May 3, 2018-ah MIMER din a remti.
19) MCI-in May 15, 2018-ah Ministry of Health & Family Welfare-ah recommendation a thawn.
20) Ministry of HFW-in May 25, 2018-ah medical college hawn phalna Letter of Permission a pe.
21) August 7, 2018-ah chief minister Lal Thanhawla'n MIMER a hawng.