KHAWTHLIR

Rangkachak man
Directorate of Revenue Intelligence (DRI) chuan tun hnai khan Mizo pathum hnen aṭangin Siliguri-ah rangkachak kg. 6.3 an man. DRI tarlan danin, rangkachak hi Ngindonsianmang (29), Kapliansanga (20) leh kumtlinglo pakhat hnen aṭangin man a ni a; kumtlinglo hi chu Kolkata Mizoram House thuneitute kutah hlan a ni. Rangkachak man hlut zawng chu cheng nuai 193 a ni.

Missionary sûnna
Mizorama Zosap missionary haw hnuhnung berte zinga mi, Rev.Dr Alwyn Roberts, August 2, 2018-a thi chu vawiin hian Berea Newydd Chapel, Bangor, Wales-ah vui a ni dawn a; Mizoram Synod pawhin vawiin chawhnu dar 3 hian Mission Veng Kohhran biak-inah sûnna inkhawm a buatsaih dawn a, a duh apiang tel turin an sáwm. Rev.Dr Alwyn Roberts sûnna inkhawm hi Rev. Lalzuithanga'n a kaihruai ang a, Mizoram Synod secretary (junior) Rev. R Vanlalnghaka leh PUC principal Dr Tawnenga ten a chanchin an sawi ang.

SA faina hnatlang
Salvation Army Women Ministry hnuaia Central North Division chuan, Inrinni khan hnatlangin Aizawl khawpui chhunga hmun hrang hrang an tifai. Hnatlang hi Central North Division-in League of Mercy, nimin Pathiannia an hman tur puala a neih a ni a; hlawm pathumah inṭhenin, Vaivakawn-Chanmari West, Dawrpui phei leh Ṭhuampui veng chhungte an thian fai a ni.

Lok Adalat nei
Kolasib district Lok Adalat chu Inrinni khan Kolasib District Court-ah an ṭhu a, thubuai 39 ngaihtuahin, pakua an chingfel. Thubuai 29 chu ṭhutkhawm leh huna ngaihtuah atan dah a ni a, thubuai pakhat erawh Civil Court rel fel turin an dah thung.