Upper Khatla-a lei dawh mek September thlaah zawh beisei

Upper Khatla Mahatma Gandhi Road-a Bible House dinna ṭhin bula thîr lei dawh mek chu Inrinni khan PWD Aizawl Road South Division hotute leh MJA member-te'n an tlawh a; PWD hotute chuan, lei chu September 2018 chhungin dawh zawh hman an beisei thu an sawi.

PWD hotute chuan, Upper Khatlaa lei dawh chu Bairabi Zophaia buaina vanga hna thawktu hnam dangte an haw vek avangin zawh hun tura hun bitukah zawh hman a ni lo niin an sawi a, "Hna thawhna hmun hi khawpui chhung a nih avangin hna a muang a, a tìr lamah chuan zan dar 2 thleng hna thawh ṭhin a ni a, thîr khawih a nih hnuah a bul vela chengte tan a bengchhen avangin zanah dar 9:30 thleng bak hna thawh theih a ni lo a, hei hian hnathawh nasa takin a timuang a ni," a ti.

PWD hotute sawi danin, lei dawh mek hi meter 50-a sei, meter 6.1-a zau tur a ni. Lei hi a laiah dotu awm loin amah leh amah a inkhai dawn a, a khaitu hi a sang lai berah meter 9 a ni ang. A chhuat chu cement concrete tur a ni a, motor leh a thil phurh ton 100-a rit dâwl zo tura duan a ni a; a dawh nan hian cheng nuai 236 ruahman a ni.

PWD hotute chuan MJA member-te chu Tuithiang leh Saron Veng inrinaa lei min ṭhinna hmun te, Armed Veng leh Bethlehem Vengthlang inkalpawhna leiminin a hnawh siam mek te, Mission Veng leh Kulikawn inkara Salem Veng panna Venghnuai péng laih zauh mek leh, Bethlehem Vengthlang kâwn aṭanga chuanhnuai kâwn panna kawnga tuihâwk luankawr siam hna thawh mekte tlawhpuiin an hrilhfiah bawk.