Mizorama HIV tam chhan zu zawrh vang - MNYF President

MNF ṭhalai (MNYF) chuan August 11, Inrinni khan Aizawl Tennis Court kawtah street campaign a nei a, MLA pahnih Lalruatkima leh Lalrinawma, MNYF president ten thu an sawi. Lalrinawma chuan, Mizorama HIV vei an tam chhan chu zu zawrh vang niin a sawi.

Lalrinawma chuan, MLPC Act leh a nghawng zir chiangtu Study Team-in an zirchiannaah, zu zawrh chu nawhchizuarin an hlâwkpui ber tih tarlan a nih thu sawiin, "Hei hian zu zawrh vangin HIV positive nasa takin an pung a ni tih a nemnghet. Sorkar tan thil mualphothlak tak a ni," a ti.

MNYF President chuan, MNF an sorkar chuan market information system ṭha zawk an kalpui dawn tih sawiin, "Hemi hmang hian sawhthing a ni emaw, thlai thar dang a ni emaw, a hralhna rate hre chung leh a hralhna tura buai ngai miah loin lo neitute kan dâwmkâng dawn a ni," a ti a; market information system chu kut hnathawktute tan ṭangkai tak a nih dawn thu a sawi.