Thisen pe
Isua Krista Kohhran (IKK) ṭhalai pawlte chuan kum 40 an tlin lawm nan nimin khan Aizawl Civil Hospital tan thisen unit 19 an pe a, a petute mipa 15 leh hmeichhia pali an ni.
Kawng siam
Mizoram Truck Drivers' Association sub-headquarters, Champhai chu Thawhlehni khan Champhai leh Zokhawthar inkar kawng siamin an hnatlang a; kawng chhe zual lai an hnawh bakah, leivûng an thianfai. Champhai leh Zokhawthar kawng hi World Bank sum hmanga siam mek ni mah se, truck tan kal a harsat avangin truck khalhtute hian an siam ṭha a ni.
Halpuah khap a ni leh dawn
Mizoram sorkar chuan kumin Krismas leh kumthar vuakvetah hâlpuah leh hâlmawi hrang hrang zawrh, lakluh, hralh leh hâl a khap leh dawn nia thu dawn a ni.
Property tax
AMC chuan thuchhuah siamin, Property Tax 2016-2017 khawn mek chu a hmuna teh thlapa assessed a nih avangin kum hmasa lam ai chuan dik zawk fe tura ngaih a nih thu an tarlang a, "Mahni tax pek tur zat ringhlel chuan AMC-ah engtiklai pawhin ziaka thlen theih a ni," an ti.
Infuih thar
Nimin khan Lunglei khawpui chhunga village defence party (VDP)-te tan infuih tharna hun Lunglei SP pisa conference hall-ah neih a ni. An hun hmanpuitu Lunglei SP Zosangliana chuan, VDP-te chu Police thâ tichak leh ṭanpui tura din an nih thu sawiin, "Mizoram sorkar pawhin a ngai pawimawh em em a, thla tina an cash incentive pawh cheng Rs. 500-a tihsan a ni," a ti.
