HM-in sorkar leh HPC(D) an inrem a beisei Remna leh muanna kan duh ve ve - Zira

Home minister R Lalzirliana chuan, Mizoram sorkar leh Hmar People Convention (Democratic)-ten inremna ngêlnghet an neih ngei a beisei thu a sawi a, remna leh muanna duh ve ve an nih thu a sawi.

Tualbung khawtlangin an khuaa zirlai leh infiammi hlawhtlingte chawimawina hun October 11, 2016-a an buatsaih a hmanpuinaah thu sawiin Home Minister chuan, "Remna leh muanna kan duh ve ve avangin HPC(D) leh sorkar chuan boruak ṭha tak hnuaiah inbiakna kan nei mek zel a ni," a ti a; remna ngêlnghet leh tluantling siam a nih ngei a beisei thu a sawi.

R Lalzirliana chuan, ram venhimna lamah sorkarin theihtawp a chhuah tih sawiin, "Mizo mipuite leh sorkar chuan remna leh muanna duha hnam pasalṭhate'n silai an tun hnuah ralthuam hmanga tharum thawh emaw, remna leh muanna tichhe zawnga kawhmawh bâwl chíng Mizoram chhungah awm an remti tawh lo a ni," a ti.

Mizoram sorkar leh HPC(D)-te hi tun hnai khan ṭum hnih an inbia a, inremna thuthlung tur an ruahman ṭan tawh. December 2016-ah inbiak leh an tum a, chutah chuan inremna atana ruahmannate an thlirho ang a, an inrem theih chuan inbiak leh hunah inremna ziah theih beisei a ni.

R Lalzirliana chuan, aia upate zah thiam, hawihhâwm leh tlawmngaihnate chu Mizo hnam ti 'Mizo' tu a nih thu sawiin, "He Zo nun mawi theihnghilh ṭhak khawpa hlawhtlinna chu hlawhtlinna khingbai a ni. Mizo ni si, lehkhathiam, hna sang tak thawk pawh ni se, Zo nun mawi an hriat si loh chuan Mizo mipuite'n kan ngaisang lo," a ti a; zirlaite chu Zo nun mawi theihnghilh lo turin a chah.

Mizoram State Commission for Women chairperson Vanlalawmpuii Chawngthu, MLA pawhin thu sawiin, "Mizo hmeichhiate dinhmun a ṭhat chhoh zel laiin hmeichhiate'n an chanvo bakah dan hnuaia an dinhmun humhimsak a nihnate chiang zawka hriat an tum a ṭul. Mizo mipa tam takin an nupui leh hmeichhiate an hmuh dan an thlak a, hnam changkang zawkte entawna hmeichhiate chu an tlukpuia an en a hun ve tawh a ni," a ti.

Inkhawmah hian Tualbung khuaa pawl 10 chin chung lam zirlai hlawhtlingte bakah, infiammi pahnih PC Lalmuankima (boxing) leh Lalnunkimi (taekwondo)-te hnenah chawimawina an hlan a ni.