Jaya-i portfolio finance minister kutah hlan

Tamil Nadu Governor Vidya Sagar Rao chuan damdawi-ina awm mek, Chief Minister Jayalalithaa-i portfolio chu finance minister O Panneerselvam kutah a hlan.

Jayalalithaa-i hi September 22 aṭang khan Chennai-a Apollo Hospital-ah enkawl a ni. A dinhmun dik tak hi puanzar ṭhat a nih loh avangin ngaihven a hlawh phah hle a ni.

Acting Governor chuan Thawhlehni zan khan thuchhuah siamin, India Constitution Article 166 clause (3) hmangin CM portfolio chu finance minister kuta hlan turin thutlukna siam a ni tih a sawi.

Finance Minister Panneerselvam hi ṭum hnih Jaya-i ai awh tur hian dah a lo ni tawh a ni. Kum 2015-a a sum lakluh phu loa hausaa puhna thubuaiah Jaya-i'n thiam loh a chan ṭum pawh khan CM aiawh tur hian dah a ni tawh a, Karnataka High Court in Jaya-i thiam a chantir thlengin a aiawh hian CM dinhmun hi a lo chelh a ni.

Tun ṭumah chuan CM atan hian thu tiamtir lakluh hran a ni dawn lo a, designation pawh tihdanglam a ni dawn lo a, mahse cabinet meeting-te a kaihruai thung dawn a ni. He ruahmanna hi Jaya-i thurawn anga siam nia sawi a ni a, charge a lak leh theih hma chuan hman a ni ang. Jaya-i chu chief minister a la ni reng tih tarlan a ni bawk.

Eptu pawl, DMK chuan Govenor thutlukna siam chu lawmawm an tih thu sawiin, CM aiawhtu dah chu state inrelbawlna atana thil pawimawh tak a ni, an ti. DMK treasurer MK Stalin chuan, "October 17-ah Cauvery lui tui inchuh chungchanga Karnataka nena kan buaina chu Supreme Court-ah ngaihtuah a ni dawn a, hei bakah hian North East Monsoon a thleng dawn hnai bawk a, state sorkarin rel tur pawimawh tak tak a neih vangin cabinet mawhphurhna a sang a, hotu dah thuai hi a ngai a ni", a ti.

Hetih lai hian rorellai, AIADMK party chuan Jayalalithaa-i hi a rilru a harh ṭha a, dam lam a pan zel avangin a aiawh lo dah lailawk hi a ṭul an tih loh thu an sawi thung.