MZP-in dan loa lo lut ram dang mite Zirna-ina an luh loh nana hmalak an rel

Mizo Zirlai Pawl (MZP) chuan nimin khan Kawrthah community hall-ah an pawl rorelna sang ber, MZP Assembly vawi 61-na an hmang. MZP hian dan loa Mizorama lut ram dang mite zirna in hrang hrangah an luh loh nan hmalak an rel.

MZP Assembly-a khuallian, parliamentary secretary TT Zothansanga'n thu a sawi a, "Sorkar hnathawk, thingtlanga awm duh lote hi báng vek se ka duh a ni," a ti.

TT Zothansanga chuan, zirlaite chu hnam din chhuah nan leh hmasawna atan an pawimawh hle tih a sawi a, "A thiam ber leh fing berte an hlawhtling vek lo a, hlawh-tlinna chang tura pawimawh ber chu taimak, tumruh leh teirei peih hi a ni," a ti a; zirlaite chu taima leh tumruh taka lehkha zir tur leh teirei peih turin a chah.

MZP Assembly-ah hian an president Lalsangzuala Ngente kaihruaiin ro an rel a; an thurel zingah, dan loa lut foreigner-te Mizorama zirna-ina an luh loh nana hmalak te, naupang chawchhun a hun taka sem a nih theih nan leh naupangte'n mumal taka an dawn theih nana hmalak te, Mizo ṭhalai/zirlaite'n social media a ṭha zawnga an hman theih nana hmalakte a tel.

Sumdawnnaah Mizote chîmrala an awm lohna tur leh Mizo sumdawngte an inenfiah fo theih nan 'Mizo dawr ni' buatsaih te, Lokayukta chak zawka hman a nih theih nana hmalak te, Mizorama Common Services (online service)-te sorkarin rate fel tak a siamsak theih nana hmalakte an rêl bawk.