Chhiatrupna thleng theia invenna zirho

Disaster Management & Rehabilitation (DMR) department leh Geo Hazards International - India ṭangkawp chuan nimin khan IPR Conference Hall-ah ‘Practical Applications of Neotectonics & Quarternary Geology in Geological Hazards Assessment training an buatsaih a, Governor Lt. Gen. Nirbhay Sharma khuallian a ni.

Training hi DMR secretary Zothankhuma'n a kaihruai a; Governor chuan, khawvela lirnghing thlen theihna hmun hlauh-awm zual panga zingah India hmarchhak bial a tel thu sawiin, "Lirnghing nasa tak a thlen hnuhnun ber chu kum 1954-a Assam rama nghing kha a ni a, chumi hnuah a aia na lo zawk mah se, a hma aia zing zawkin hmarchhak state hrang hrangah lìr a nghîng a ni," a ti.

Larsap chuan, Mizorama a awm tirha leilung awm dan a hmuhin, lir-nghing leh khuarêl chhiat-na dangte thlen theihna hmun a ni tih a hmuh thu sawiin, "Sorkar lam pawhin invenhimna tur dante siam ṭhin mah se, mipui lamin an zâwm
ṭha tâwk lo niin a lang," a ti a; lirnghing, leimin leh chhiatna hrang hrang thleng thei dinhmunah ding tih inhre reng chunga a nghawng chhiat tur tihnêpna tura hmalak a ṭul tak zet tawh thu a sawi.

GeoHazards International-a landslide specialist Kevin Clahan chuan, hmarchhak bialah, a bik takin lirnghing leh lei min/tlahniam a tam thu sawiin, "Leimin tamna chhan zingah thing leh mau tihchereu nasa leh boruak sik leh sa inthlak danglam nghawng a ni," a ti.

Kevin Clahan chuan, training ni 10 chhungin leimin leh khuarel chhiatna dangte a thlen pawha nunna leh bungruate'n an tawrh nêp theihna tur an sawiho a ni dawn tih a sawi a, "Aizawl district-a lei min/tlahniam leh lirnghing laka invenna tur rawtna hrang hrang siamte sorkar hnenah thehluh a ni zel ang," a ti.

Ni 10 training chhung hian mithiamte kaihhruai-na hnuaiah Aizawl leh chhehvel hmun hrang hrangah kalin, an zir
chiang ṭhin dawn a ni.