Sum hman dan hre chiang loah MNYF puh

13th October, 2016

Congress ṭhalaite chuan thuchhuah siamin, MNF ṭhalai president K Vanlalvena leh Mamit Block MNF ṭhalai hruaitute'n October 7, 2016-a Mamita press conference an neih ṭuma Mamit panna kawng-
pui siamna turah sum awmna Mizoram sorkar sawi tura an phût chu, sum hman dan chin an hriat chian loh vang niin an tarlang.

MPYCC chuan, Mamit kawng chu sorkar laipuia Ministry of Road Transport and Highway (MoRTH) enkawl a ni a, Mizoram sorkar a inrawlh lo niin an sawi a; "Kawng chhe siamṭhatna (ordinary repair) atan kum li, 2012-2016 chhungin Rs. 2,47,07,099 hmuh a ni a, sumte hi hna hmanhmawhthlak, side drain tihfai, kawng khuar hnawh, bailey brige siamṭhat leh kawngba sâm fai nan hman a ni," an ti.

MPYCC tarlan dan-in, NH-44-(A) km. 11 - 114.618 (km. 103.618)-a thui zauh hna Gayatri Project Ltd.-in an thawh mek chu May 2012-ah estimate-a dah aia tam daih lung chang laih a ngai dawn tih PWD hotute'n an hriat chhuah avangin November 2013-ah revised estimate an thehlut a; chumi chhung chuan lung chang laih man MoRTH-in a pek theih loh chhuanlamin contractor-in hna an thawk mumal lo.

Chuti chung chuan, motor kal harsa khawpa kawng a chhiat/hnim avangin sorkarin mipui harsatna hriain sum pawt khawmin, NH-44-A enkawl nan a pek belh tih sawiin, "Heng sum hmang hian PWD-in kawng chhe zual lai siamṭhat hna an thawh bakah, Tlawng lei chim siamṭhat nan hman a ni," an ti.

Congress ṭhalai tarlan danin, kum li chhungin ordinary repair atan cheng nuai 247.07 hmuh a ni a; chu'ngte chu - kum 2012-13 ah nuai 73.59, kum 2013-14 ah nuai 36.53, kum 2014-15-ah nuai 72.75 leh kum 2015-16 ah nuai 247.07 a ni.

Flood Damage Repair (FDR) nan MoRTH aṭangin kum tin sum hmuh ṭhin a ni a, mahse, NH-44-A zauh chhunga leimin emaw, kawng thlang chim retaining wall remna tur pawisa a tel ngai lo. FDR atan hian kum li chhungin cheng nuai 103.57 hmuh a ni a; chu'ngte chu - kum 2012-13 ah nuai 33, kum 2013-14 ah nuai 10, kum 2014-15 ah nuai 46.19 leh kum 2015-16 ah nuai 14.38 a ni.

NH-44-A kawngpui, km 0 aṭanga 11 thleng Improvement of Riding Quality (IRQP) resurfacing hna chu SLT Infracon Pvt. Ltd. hnenah Rs. 8,86,78,639.56 pek a ni a, hna hi zawh tawh niin, Rs. 8,91,67,896 sen a nih thu MPYCC chuan an tarlang a; chu pawisa chu kawng zauh hna thawh mek, km.11 aṭanga 114.618-na inkarah hman tur a ni lo niin an sawi bawk.