MBDPF hruaitute thubuai tihtawp ngen Bru-te in sak nan Rs. 1,30,000 pek remti

Mizoram Bru Displaced People Forum (MBDPF) chuan, Mizoram mi Bru, tuna Tripura-a awm mekte Mizorama lâk lêt an nih chuan, MBDPF hruaitu thubuai nei zawng zawng an thubuai tihtawpsak an duh thu an puang a; sorkar laipuiin PMAY hnuaiah Bru chhungkaw tinte Rs. 1,30,000 pek an remti niin an sawi.

MBDPF hian thuchhuah siamin, October 10, 2016-a New Delhi-ah Mizoram Bru, tuna Tripura-a raltlan mekte Mizorama lak let dan tur ngaihtuahnaah, Ministry of Home Affairs (MHA) hotute'n Bru chhungkua Mizorama lette hnenah Pradhan Mantri Awas Yajana (PMAY) hnuaiah Rs. 1,30,000 pek a thuphungin a remti niin an tarlang.

MBDPF thuchhuah tarlan danin, October 10-a Delhi-a Joint Monitoring Group (JMG) meeting-ah hian Bru-te Mizorama an kir hunah sorkar laipuiin chhawmdawlna a pek turte sawiho a ni a; a hmaa chhawmdawlna peka la tel ngai lo, in sak ṭanpuina pekna tur scheme kal lai, PMAY hnuaiah Mizorama let Bru chhungkaw tinte chu MHA chuan a thuphungin in sakna atan Rs. 1,30,000 pek a remti a ni.

Mizorama let Bru-te ṭanpuina tura ruahman an sawihote chu - in sak ṭanpuina chhungkaw tin hnenah Rs. 38,500, sum faia ṭanpuina Rs. 41,500, kum hnih chhung free ration pek (ni khatah puitling pakhatah gram 600 leh naupangah gram 300), Tripura aṭanga Mizorama letna (kalna) man leh chhungkaw tin hnenah blanket leh bungbél pekte a ni.

Meeting-ah hian MBDPF chuan MHA leh Mizoram sorkar chu Bru lak letna atana ruahmanna an siam, road map/repatriation plan pe turin an ngen. Bru lak lêt hna buaipuinaah MBDPF hruaitute tel ve an duh thu te, Bru lak lette dahna tur khua enfiah hmasak an duh thute an thlen.

PMAY hnuaia in sak ṭanpui pek MHA-in a remtih chu final road map-ah telh an duh thu te, MBDPF hruaitu criminal/defamation nei zawng zawngte thubuai tihtawpsak an phût thu te, chhungkaw tin hnenah ram hectare 5 aia tlem lo pek te, sum faia ṭanpuina tihpun an duh thu te, kum 19 chhung Tripura-a an awm laia nau piang zawng zawng hnenah birth certificate pek an duh thu te, MHA hotute'n Tripura-a relief camp-te enfiah se an duh thu te, kum 2009-a Mizoram aṭanga tlanchhia chhungkaw 613-te final repatriation plan-ah telh an duh thute an thlen bawk.

Meeting-ah hian MHA hotute chuan Mizoram sorkar aiawhte chu kumin November aṭangin Bru-te hruai kîr turin an chah a; MHA joint secretary (NE) Satyendra Garg chuan, MBDPF hruaitute chu Mizoram mi Bru-te Mizorama kir tura hmin turin an ngen a ni.

Tarlan tawh angin, Mizoram sorkar chuan Mizoram Bru-te chu kumin November thla aṭangin Mizoramah lak let tumin hma a la mek. Chutih rualin, inpeih hman loh hlauhthawn thilah January 2017 aṭanga lak let turin rawtna an siam bawk niin an tarlang.

MBDPF press release hi an president A Sawibunga leh general secretary Bruno Msha te hminga chhuah a ni.