Hnahthial khawtlangin doctor an dang An inbiak rem hnuah an kal chhuahtir
Hnahthial khawtlang chuan an khaw damdawi-ina medical officer Dr Lalrengpuii, Tlabunga sawn a nih duh loh lantir nan nimin khan Dr Lalrengpuii Ralte te chhungkuain Hnahthial khua an chhuah tur an dang a; an inbiak rem hnuah an dan chu chhunah titawpin an kaltir.
Hnahthial NGO Joint Committee chuan Hnah-thial Sub-District Hospital-a Medical Officer hi a thlaktu tur dah loa sawn chhuah a ni chu an duh lo a, a thlaktu tur dah a nih hma chuan Hnahthial a chhuahsan tur dan an tum a ni. An ruahman lâwk angin, Hnahthial khawtlang chuan nimin zing dar 6 aṭang khan doctor quarters bulah an dang ṭan.
Doctor-te chhungkua lamin anmahni dangtute hnenah palai tirin, sorkar hnathawk an ni a, sorkarin a dahna apianga awm tur an nih avangin chhuah turin chu an ngen a; an ngennate sawiho a nih hnuah Hnahthial khawtlang chuan chawhma dar 11:30-ah kaltir an remti ta a ni.
Hnahthial V/C, MJA & NGO Joint Committee chuan thuchhuah siamin, Health Minister hnenah doctor sawn chhuak lo tur leh loh theih loha sawn chhuah a nih pawhin, a thlaktu tur doctor pe tura an ngenna chu, tihhlawhtlin a ni dawn tih an bialtu MLA John Siam-kunga hnen aṭangin an dawng a, chu chu rintlakah ngaiin, Dr Lalrengpuii chu an titawp tih an tarlang.
Hnahthial NGO-te chuan, Dr Lalrengpuii thlak nan State Referral Hospital-a thawk mek Dr Malsawmsanga dah a ni dawn niin an sawi a, "Dr Malsawmsanga Hnahthialah lo awm ngei tura South Tuipui MLA John Siamkunga'n phone hmanga Lalhmingliana Lianhna, President, Block-I Congress Committee hnena a lo hrilh avang leh Lalhruaitluangi, SDO(C) Hnahthial hnenah a hrilh chu rintlak ngeiah kan ngaih avang leh, Dr Lalrengpuii Ralte hmakhua ngaihsak a, a kal chhuah phal mai tura a nu leh pate'n palai tíra an ngenna avangin zing dar 6 aṭanga khawtlangin kan dan chu chawhma dar 11:30-ah kaltir a ni ta a ni," an ti.
Thu dawn danin, Dr Lalrengpuii Ralte te hian chhun dar 12-ah Hnahthial chhuahsanin Lunglei an pan a, vawiin lamah Tlabung thlen hman an tum a ni.