MPC-in kawng ngaihsak loah sorkar puh

MPC ṭhalaite chuan thuchhuah siamin, National Highway No. 54 ngaihsak tawk loah sorkar puhin, "Mipuiin harsatna kan tawh phah leh ṭhin hi pawi kan ti hle," an ti.

MPC ṭhalai chuan, "Mizoram a kawngpui pawimawh berte zing a mi, state dangte nena in kalpawhna kawngpui pawimawh, chakkhai, mamawh hrang hrang kan lak luhna NH No.54 hi enkawl a, venhim a,
thawmthat ngai reng a nih laia Mizoram sorkarin a buaipui tawk loh avang-a mipuiin harsatna kan tawh phah leh ṭhin," an ti a, kawngpui enkawlna kawnga sorkar inthlahdahna chuan mipuite himna leh mipuite hmakhua an ngaihpawimawh tawk lohzia a tichiang niin an tarlang.

MPC ṭhalai tarlan danin, tunhnaia Edenthar Venga NH No.54 min hi a hma pawhin a lo min zauh zauh tawh a, a min nasa tur ven kawngah sorkarin hma a lak loh avanga tun din-hmuna harsatna hi mipuiin kan tuar leh ta a ni.

Mizoram sorkar chu mipuite'n harsatna tawp khawk an tawh hnu chauh-a chet tum lovin, mipuiin buaina leh harsatna kan tawng buak hma ngei a, arang thei ang bera hma la ṭhin tawh tur sorkar ngenin MPC
ṭhalai chuan, "NH No. 54 siamṭhat tuma sorkarin ruahmanna a neih mek hi chak taka bawhzui tur leh a tha thei ang bera siam turin sorkar kan duh tak meuh meuh a ni," an ti.