Faina Hapta pualin Fai lawmman sem a ni
Aizawl Municipal Corporation (AMC)-in chawlhkar khat awh Faina Hapta an hman chu nimin khan Chanmari YMA Hall-ah khâr a ni a; Faina Hapta puala fai lawmman an buatsaih hrang hrangte sem a ni.
Faina Hapta khârna inkhawma khuallian, Aizawl mayor PC Lalhmingthanga chuan, Aizawl khawpui chu hmarchhak state khawpui zingah fai ber lawmman dawng pha tawh mah se, ṭan lak a la ngaih nasat thu a sawi a, "Tih tur a la tam a, bawlhhlawh sawngbawlna
ṭha tak kan neih a ngai a, in leh lo leh a velte fai taka enkawl ṭheuh a ngai," a ti a; SIPMIU lamin bawlhhlawh sawngbawlna an buaipui mek thu a sawi.
PC Lalhmingthanga chuan, Aizawl khawpui chhung hmun chêp taka vawk leh ár vulh chu a ṭha lo tih sawiin, "Ṭhenawmte tan hnawksak a ni. Ṭhenawmte vawk leh ar vulh vanga rimchhia tawrhtir reng hi a Mizo lo a, a Kristian lo. Fai turin changkan a ngai a, thil neiha changkanna lam ni loin, rilru lama changkan a ngai," a ti.
Aizawl Mayor chuan, Faina Hapta puala fai lawmman dawngtute chu an lawmman dawnah duh tâwk mai loin, fai zual zel turin a chah a, lawmman dawng lote pawh fai ber nih tum turin a chah. Aizawlah ni tin bawlhhlawh metric ton 150 vel paih a nih thu leh bawlhhlawh paih nan thla tin cheng nuai 27 vel hman ṭhin a nih thu a sawi.
Aizawl deputy mayor Lalringliana pawhin thu sawiin, faina chu thinlungah a inṭan a pawimawh tih sawiin, "AMC chuan ṭha zawka bawlhhlawh sawngbawl dan a ngaihtuah mek a ni," a ti. AMC commissioner Dr H Lalthlangliana pawhin thu a sawi a, MJA president Vanlalrema Vantawl-in veng fai an thlan dan a sawifiah.
Aizawla veng leh college fai thlannaah hian MJA chu endik tura ruat an ni a, Faina Hapta kharna inkhawmah hian fai thlante chu lawmman hlan an ni. Aizawl khawlai phiat faitu (sweeper) thawk ṭha leh Faina Hapta pual intihsiakna a ti ṭhate hnenah lawmman sem a ni bawk.
Veng fai thlante
1-na Laipuitlang
2-na Republic Vengthlang
3-na Luangmual
College fai
1-na Aizawl Theological College
2-na Pachhunga University College
3-na Mizoram Hindi Training College
Sweeper Ṭha
1-na Rinawma
2-na L Biakkungi
3-na Lalrinpuii