HC Judge-in Serchhip tlawh

Gauhati High Court judge Michael Zothankhuma chuan nimin khan Serchhip district a tlawh a, Serchhip DC Dr Lalrozama leh chief judicial magistrate Lalngaihmawia Zote ten lo dawngsawngin, sorkar official-te nen thil pawimawh hrang hrang an sawiho.

Michael Zothankhuma chuan, harsatna an neihte leh hmalak dan tur sawiho tura Serchhip tlawh a nih thu a sawi a, "District tinah E-Court Project kalpui mek a ni a, hemi hmang hian Police department, District Court leh Jail-te chu tunlai thiamna hmanga thlun zawm vek a, video conferencing hmanga hna thawh a nih theih nan hmalak mek a ni," a ti.

Thawktu indaih lohna chungchangah High Court Judge chuan, "Thubuai ngaihtuah chungchangah duh anga chak hmalak a harsa hle. District tina harsatna an neihte pawh a theih ang chin chinah ngaihtuahsak tum a ni," a ti a; chak zawka hmalak a nih theih nan department hrang hrangte thawhhopuiah a sáwm.

Michael Zothankhuma hian New Serchhip, Khawtetlang rama District Court Officers quarters sakna tur ram chu a hmunah kalin a enfiah nghal a, an ram neih hi duh anga a zau tawk loh deuh avanga officers quarters pawh la sak rih loh a nih thu sawiin, "A ṭul anga hma lak chhunzawm mek a ni," a ti.

Serchhip District Court-ah hian CJM hoin thawktu mi 11 an awm mek a ni.