Inkhel thiam bik, ball chan laia chiai ngai lo leh fing taka thutlukna siam thei, a pumrua aṭanga teh chi ni miah lo Andres Iniesta chuan football a chawlhsan fel ve ta, kum 40 mi midfielder hian a boot hman thiam chu a khai ṭha ta a ni.

Barcelona legend chawlh tur thu hi khawtlang chanchinbu mite chuan kar hmasa khan an sawi tawh. Mahse, Ocotober 8, Thawhlehni khan a chawlh thu hi a puang - Ni 8 a tih kher chhan chu jersey number 8 a hak ṭhin vang a ni.

Iniesta hian a chawlh thu hi social media lamah video kaltlangin a puang a, a video dah sawifiahna tawi (caption) atan "He Infiamna hi chu a la kal zel ang" a ti, amah chawl mah se football chu hmalam pana a kal zel tur thu a sawi lang.

Barcelona tana a khelh pui ṭhin Lionel Messi chuan a lehkhabuah Iniesta chanchin ti hian a lo ziak tawh a, "Khelmual chhungah chuan ka bula awm tura ka duh mi a ni, a bik takin hun harsa kan tawh laiin ka kiangah awm se ka duh," a ti a, a chawlh thu a hriat hnuah pawh Messi hian a ui thu leh duhsakna a ṭhlan thu a tarlang zui leh bawk.

Mi bik

Naupangte, kum 12 mi a nih lai aṭangin khawvela football zirna ṭha berte zinga mi La Masia aṭangin a inzir a, a tirah chuan a nu leh pa tel loa riah hran chu khawhar thlak a ti a, mi zakzum mi a nih bawk avangin a inkiltawih hle ṭhin.

Football khel tur bika piang a ni a, Barcelona Under 15 tan captain a ni thei a, chutih lai chuan tuna manager ropui ni ta Pep Guardiola chuan Xavi hnenah, "Iniesta hian min la nek chhuak vek dawn a ni" tiin a thiamna chu midang chunga mi a nih thu a lo sawi daih tawh.

A chanchin an sawi ṭhin dan pakhatah chuan, "Football hi zirtir hran a ngai lo a, a thiamna tih danglamsak tum pawh a ngai lo, a duh ang taka a inkhelh theih nan venhim tawp mai tur a ni," an ti ṭhin, khelmual chhunga a chetla lai hmu ṭhin tan chuan a mak hran lo.

5ft 7in a sang Iniesta hi Cesc Fabregas nena inzir chhuak rual an ni a, a tirah chuan defensive midfielder a ni. Mahse, a ball thunun thiam dam, a chet ranna bakah a finna hmanga defender a bum thiam em avangin attacking midfielder atan hman chhunzawm a ni ta zawk.

Frank Rijkaard khan, "False winger, central midfielder, deep midfielder bakah striker hnung chiahah ka khelh tir a, sawisel tur awm lo khawpin a khel thei vek," a ti. Juan Roman Riquelme leh Ronaldinho te awm loh lang miah loa hnawhkhat thei a nihna hian a thiamna chu a hrilhfiah.

Man of the Match

Barcelona tan nomawi chawi theih zawng zawng a chawi kim a, an ram Spain chu World Cup leh Euro-ah a champion pui bawk. World Cup final, European Championship final leh UEFA Champions League final-ah te man of the match a ni thei vek a, hetiang ni thei awmchhun hi a ni hial.

A goal khung leh match a khelh tam tak zinga hriatreng tur chu 2010 World Cup final kha a ni. Netherlands nen champion nih an inchuh a, ram pahnih te an inkhel tawk takzet, a tawpah erawh Iniesta goal hmangin Spain an chak - an ramin a vawi khat nan World Cup nomawi an chawi a, an lak awmchhun a la ni ta bawk.

Euro champion vawi hnih an nih theih nan pawh mi bik a ni a, a bik takin Euro 2012 final-a Italy an hneh ṭumin a khel ṭha fal a, an khingpui player ten an bawr lai thlalak chu tun thlenga sawi hlawh a la ni, hemi ṭum hian Man of the Match atan thlan a ni a, midang tan chuh buai chi a ni lo. Player of the Tournament atan thlan a ni zui nghal bawk a ni.

Ram tana a ṭangkai ang bawkin Barcelona tan pawh a ṭangkai, a sulhnu ropui zawng zawng pawh sawi sen a ni lo ang. Champions League final 2015 an khelh ṭum khan Olympiastadion, Berlin-ah Juventus nen an inhmachhawn a, Catalan club hi 3-1 in an chak.

Turin club an hneh ṭum hian Ivan Rakitic, Luis Suarez leh Neymar ten goal an khung a, khelmual chhunga player hmuhnawm leh ṭangkai ber, mimal chawimawi phu bera an thlan erawh Iniesta tho a ni, goal a pawimawh rualin team khaikhawmtu pawimawhna a nep chuang lo tihna a ni.