Rinchhana dilna an pawm lo

Mizo Inchai Palian champion lai Lalsangliana chotu Lalrinchhana Sailo chuan hliam vangin title fight hun sawn hlat dil mah se an pawmsak lo. Ruahman lawksa angin December 9 aṭanga 11 chhungin LPS Arena, Falkland-ah Inchaipui neih a ni ang.

Kar hmasa khan Mizoram Wrestling Association (MWA) hruaitu te, technical mite leh media lama an thawhpui LPS Vision aiawhten Rinchhana'n a dar a tihnat dan leh doctor lehkha a theh luhte ngun takin an ngaihtuah a, zau zawka damdawi lama mithiamte an rawn hnuah hliam na tak a ni lo a, inchai ṭhinte chunga thil thleng ṭhin pangngaiah an ngai a ni.

MWA hruaitute chuan, "Rinchhana dilna hi zahawm hle mah se a hun sawn hlat a nih chuan title fight dang zawng a nghawng vek dawn a. Sipai, December kar hnihnaa inchai tura chawlh la tawh te, he hun atana kawng hrang hranga inbuatsaih tawhte vek an ni hlawm a ni," an ti.

MWA hruaitute hian North Vanlaiphai tlangval chungchang an ngaihtuah laiin amah an be rawn nghal a, thla hnih hun a la awm a, thla khat chhunga a dam hman an beisei thu leh mi dang ngaihtuah chungin hun ruat tawh kal tlangpui an duh tih an hrilh a, ani pawhin a pawm thei a ni.

Kum 29 mi Rinchhana hian August khan champion lai Lalsangliana cho thei tur zawnnaah Lalremtluanga (Zobawk) leh Laldinthara (Zokhawthar) a hneh ve ve a, a vawi khat nan Mizo Palian Inchai title chuh turin a tlang a, a chenna Kolasibah inpuahchah zui nghalin hliamin a inbuatsaihna a tikhaihlak ta a ni.

Kum 33 mi Sangliana pawhin chhuanlam siam theihna remchang a nei a, kuminah lirtheia na taka a chet sual aṭanga kum khat chhung inchai lo tura tih a ni. Mahse, a vawi thum nan a title himhim turin a taksa a inpeih tawh niin a hria a, ngawrh takin a inbuatsaih mek.

Zan thum awh tur title fight-ah hian palaihawl champion Remruatpuia leh amah chotu Ngursangzuala, pate champion B. Lalawmpuia leh amah chotu Lalchhanhima an innuai dawn a ni.

Nulian champion Lalhmangaihsangi leh amah chotu Zodinpuii, nulaihawl champion Elizabeth Rohlupuii leh amah chotu Penticost Lawmsangpuii Varte, nute champion Lalvenhim leh amah chotu Lalnuntluangi te bakah, freestyle wrestling tihhmasawn nan exhibition match eng emaw zah a awm tel bawk ang.