England: Gibbs-White, Konsa leh Mainoo inhnukdawk

UEFA Nations League khel tur England squad aṭangin Morgan Gibbs-White, Ezri Konsa leh Kobbie Mainoo te chu an inhnukdawk vek a, player pathum hi tun international break-a Three Lions tana inlan turin an in 'fit' tawk lo.

Hetihlai hian captain Harry Kane chu kartawp inkhelah hliam vangin lakchhuah ngai mah se, England medical staff-ten an en dik hnuah ram tana inlan turin a in fit tawkah an ngai a, a inlan dawn.

England coach lailawk Lee Carsley chuan tun international break atan hian player 25 a ko a, player 22 chu England national team training-na hmun St. George's Park-ah an in 'report' - Carsley chuan Gibbs-White, Konsa leh Mainoo aiawh tur player koh a tum lo.

Inhliam chu

Nottingham Forest midfielder Gibbs-White-a'n Forest tan season duhawm tak a hmang a, thla hmasa khan Three Lions tana a match hmasa ber a khel. Kar tawp inkhelah Chelsea nen 1-1 in an inhnehtawk a, he inkhelah hian 'shot' a danna lamah a inhliam.

Aston Villa defender Konsa pawh Pathianni zana Manchester United nen an inhnehtawkna inkhelah a inhliam a, he inkhelah vek hian United midfielder Mainoo lakchhuah a ngai bawk - international break-ah an chawlh hahdam a ṭul phah.

England hian tun international break-ah Nations League match hnih an khel dawn a, October 10, Zirtawpni zanah Greece an mikhual ang a, October 13, Pathianni zanah Finland an lenchilh bawk ang.

Solanke telna

England squad-ah Tottenham Hotspur striker Dominic Solanke a tel a, kum 2017-a ram tana a match hmasa ber Brazil laka a khelh hnua England tan inlan tura koh a nih leh hmasak ber a ni. Carsley chuan, "International break hmasaah khan koh tur a ni a, mahse a inhliam avangin ka ko lo. Bournemouth-a a khelh ṭhat kha Spurs-ah a chhawm nung a, ka player duhzawng tak a ni," a ti.

Solanke hian season hmasa khan Bournemouth tan inelna hrang hrangah match 42 khelin goal 21 a khung a, heti chung hian Euro 2024 squad-ah a tel lo. Solanke chuan, "Hun a liam ve nual ta - ram tana ka inlan leh thei tur chu ka lawm hle mai," tiin social media lamah a ziak.

Kum 27 mi striker hian nipui transfer-ah Cherries chhuahsanin, Spurs chu pound maktaduai 65-in a zawm a, hliamin tibuai zui mah se, match riat a khelhsakah goal thum khung tawhin, assist vawi hnih a nei tawh bawk.

Maguire a tel lo

Gareth Southgate-a hnuaia 'regular', Manchester United centre back Harry Maguire chu koh zingah a tel lo a, Carsley chuan, "Centre back ṭha tak tak, ram tana an inkhel lai hmuh duh kan nei a ni.

"Harry hi England tan a la pawimawh reng a, Nations League atan pawh a ṭangkai zel ang," a ti a, Red Devils defender an koh loh chhan sawi chungin, a tan erawh hmun a la awm reng thu a sawi.

West Ham-in beisei anga season an hman loh avangin Hammers captain Jarrod Bowen chu koh zingah a tel lo a, Newcastle United defender Tino Livramento pawh koh a ni lo.

Lang phak lo

Aston Villa midfielder Morgan Rogers chuan season duhawm tak hmang mah se, Three Lions-ah a tan hmun a awm lo. Kum 22 mi hian tun season Premier League leh Champions League match an khelhah bul a la ṭan vek a, Carsley mit a tlung chuang lo.

Euro 2024-a lang phak lo James Maddison tan hmun a awm lo zel a, Tottenham Hotspur midfielder hian tun season-a match kua a khelh tawhah goal hnih khungin assist vawi thum a nei. Ram tana inlan tur chuan hei aia ṭhaa a khelh a ngai.

Manchester United forward Marcus Rashford tan hmun a awm lo tluang zel a, March 2024 hnuah koh a ni leh tawh lo. Crystal Palace winger Eberechi Eze pawh koh a ni lo a, international break hmasaa koh loh, Manchester City defender Kyle Walker a lo kir thung.