A khel ṭha lo zawk Aizawl FC an chak

LZ Juice MPL11 semifinal first leg-ah Aizawl FC-in Sihphir Venghlun 2-0 in an hneh. I League club tan C. Lalhriatpuia leh Lalrinzuala ten goal an khung a, minute 90 chhunga khel ṭha zawk Sihphir Venghlunin goal an khung thei lo.

Semifinal second leg hi October 11, Zirtawpni zan dar 8:00-ah khelh leh tur a ni a, away goal rule a awm tawh lo. Sihphir Venghlun tan penalty shootout thleng turin goal hniha chak a ngai a, Aizawl FC erawh goal khata an chak loh pawhin final an lut tawh dawn tho.

Nizan khan semifinal hnuhnung zawkah Chanmari FC leh Mizoram Police te an inkhel a, result kan hre hman lo. Final hi October 15, Thawhlehni zan hian RG Stadium-ah khelh a ni ang.

A goal hma

Inkhel an ṭan chauh a, Aizawl FC-in minute khat pelh awrhah goal an khung nghal. Dinglam aṭanga Augustine Lalrochana cross satliah chu Sihphir Venghlun goalkeeper Lalhruaizela'n a man pial a, ball per chu C. Hriata'n goal ruakah a pet lut. Goalkeeper chetsual vanga goal a nih rualin Farkawn/Republic Veng tlangval C. Hriata awmna a dik ve bawk.

I League club-in league round-ah Sihphir Venghlun an sawp tawh avangin goal an khung nual a rin theih a, mahse rin ang a ni lo. Sihphir Venghlun an khel ṭha zawk a, ball an in pass thei zawk a, mahse goal hmaah an hriam tawk lo. Midfielder Lalbiakzuala'n box pawn aṭangin ṭha zetin pet mah se goalkeeper Vanlalhriatpuia'n a dansak.

Goal khung thei Rinzuala

Second half-ah pawh Sihphir Venghlun an che ṭha zawk a, goal chance pawh an ngah zawk. Mahse, Aizawl FC-in chance ṭha bik an ngah zawk a, Lalbiakdika pawhin goal khung tam ber record nih rual theihna hun ṭha a hlah. Champhai Zotlang tlangval hian C. Hriata aṭanga a ball hmuh chu pet fuh tawk loin Sihphir Venghlun keeper tan buaina a ni pha lo.

First half-a chance ṭha hlahtu BZ-a goal hmaah a hmui tawk lo a, second half-ah pawh goal zawnah a pet thei lo. Sihphir Venghlun an khel ṭha a, mahse an nawr nat avangin Aizawl FC-in goal khung theihna remchang an ngah zawk.

Samuel Lalmuanpuia'n a class a pholang a, a freekick pet ṭha zet chu goalkeeper Hruaia'n a dang hman. Shillong Lajong leh Mohammedan midfielder hlui Samuel-a through ball ṭha pawh Augustine-a'n um lutin goal-ah pet hman mah se defender Johny Lalrindika'n a pet chhuak hman.

C. Hriata pawhin chance ṭha dang a hlah a, Aizawl FC-in goal khungtu an mamawh. Minute 85-naah Rinzuala a rawn lut a, Aizawl FC-in vannei takin penalty an hlawh chhuak zui. Substitute Laltlanzova'n Sihphir Venghlun defender Zohminga ke a pet per hnuah ball-in a kut a per zui a, referee Lalrawngbawla'n penalty pein Rinzuala'n injury time-ah chak nemnghehna goal a khung. Serchhip tlangval hian match hnih lek a la khel a, substitute aṭanga lut ve vein goal a khung ve ve.