Dutch football legend Neeskens a thi

Netherlands football legend Johan Neeskens chu kum 73 mi niin October 6, Pathianni khan Algeria-ah a thi a; a thih thu hi Royal Netherlands Football Association (KNVB) chuan October 7, Thawhṭanni khan a nemnghet.

Neeskens-a thih thu hian Netherlands chauh ni loin khawvel a barakhaih a, sulhnu a neih tawhna Mizoram thlengin uitu an ṭhahnem hle. Dutch football legend hian a nupui Marlis von Reding leh a fate pali a kalsan a ni.

Neeskens hi kum 1970 chhoa Netherlands team ropuia player pawimawh ni phak a ni a, hetihlaia Dutch football team-in an larpui 'total football' tihlawhtlingtu zingah a tel - he team ropui leh an system sawi a nih apiangin Johan Cruyff hming lamrik hmasak ṭhin a ni a, a dawta Neeskens hming ziah a nih loh chuan a famkim ṭhin lo.

Netherlands tan Neeskens hi vawi 49 inlanin goal 17 a khung a, assist vawi nga a nei. World Cup 1974 leh 78-ah final lut mah se an chak zo lo a, Euro 1976-ah pathumna an ni bawk - WC 1974 final-ah hian penalty aṭangin goal hmahruai a khung a, minute 2-naa a goal khung hi tun thlengin World Cup final-a goal lut rang ber a la ni reng.

Ajax leh Barcelona-ah Neeskens hian hming a chher a, a sulhnu a ropui hle. Neeskens hi a vanglaiin khawvela coach ropui bera tam takin an ngaih, Barcelona, Ajax leh Netherlands coach hlui Rinus Michels leh Romanian-Hungarian coach ropui Stefan Kovacs te hnuaiah a khel hman a, inkhelh a chawlhsan hnua coaching a luhchilh hnuah pawh a thawhpui hraw ṭhin hle.

World Cup 1998-ah khan Guus Hiddink-a sawmna ngai pawimawhin Frank Rijkaard leh Ronald Koeman te nen Dutch team-ah assistant hna an thawk ho a, Rijkaard-a hnuaiah hian Barcelona leh Galatasaray-ah assistant coach hna a thawk tawh a, Hiddink-a'n Australia a enkawl khan a thawhpui bawk.

A hun tawp erawh KNVB hnuaia awm WorldCoaches programme tan a hmang a, Mizorama a rawn kal chhan pawh kha WorldCoaches programme tho a ni. Nikum April 17-23 chhung khan Lammual, Aizawlah Neeskens kaihhruaina hnuaiah WorldCoaches programme hlawhtling taka neih a ni.

Neeskens chuan, "WorldCoaches programme-ah chuan football club angin pressure a awm ve lo a, chak leh chak loh a awm ve lo. Ni tin mai hian kan hlim a, naupang enkawl hi nuam ka ti," tiin Vanglaini a hrilh tawh a, a hun tawp pawh football tan a hmang. Algeria-ah WorldCoaches programme neih a ni a, hetah hian nuam sam loin damdawi inah hruai ni mah se chhan theih a ni ta lo.