MPL chanchin : Dinthar aṭanga Police thlengin

Mizoram chhunga football inelna sang ber Mizoram Premier League pawh hlawhtling takin kum 10 chuang khelh a ni tawh a, kuminah season 11-na khelh a ni mek.

MPL hmasa berah Mizoram club hlun ber zinga mi Dinthar FC an champion a, Maimawms-in nomawi chawi theih nan champion tura tura rinkai Mizoram Police an hneh thei a, champion an phu.

Dinthar FC hi tualchhung football-a sulhnu nei ṭha T. Vanlalhluna'n a enkawl bawk nen MPL hmasa ber champion nih hi an inhmeh hle. MPL2-ah Lammual zan boruak tem chhoh a ni a, Mizoram football hmel thlak danglamtu pakhat H. Vanlalthlanga hun inher chhuakin Chanmari FC an champion.

Chanmari vanglai hun a rei lo a, Aizawl FC-in MPL3 final hmuhnawm taka Chanmarians an hneh hnuah I League club hun a inher chho. Aizawl FC hian I League an khelh chhoh miau avangin foreigner an nei ṭha a; I League-a kaipuitu K. Malsawmkima bakah Manuel Retamero, Gift Raikhan leh Standly Rozario ten nomawi an chawipui vek.

Chutihrualin Aizawl FC champion inkarah hian Lalsangzuala Hmarin Chanmari FC leh Chhinga Veng a champion pui a, Santosh Trophy hnuhnung bera Mizoram semifinal thlenpuitu Sanga hian MPL9-ah Chawnpui a champion pui leh bawk.

MPL-ah foreigner chhawr phal a nih loh hnuah Aizawl FC an la champion leh lo a, Mizoram Police hun a inher chhuak ve bawk. Lalbiaksanga Colney kaihhruaina hnuaiah Police-in an vanglaia an tih theih loh All India Police Meet-ah an champion a, MPL-ah nomawi an chawi bawk.

MPL11-ah Aizawl FC, Chanmari FC leh Police te chu champion tura rinkai an ni hlawm a, champion tur a chiang thuai dawn e.