MFA buatsaih Veng/Khua inelna Champion lawmman nuai 2 leh sial

Mizoram Football Association chuan November thla tir aṭangin GIG Motors All Mizoram Inter Village Football Tournament 2024 a buatsaih dawn a, Mizoram pum inelna a nih avangin ngaihven a hlawh ang.

Entry fee hi Rs 2000 a ni a, phone number 9862560134-ah GPay hmangin a pek theih a, entry fee hi October 28, Thawhṭanni tlai dar 4:00 thleng a pek theih. MFA Office, City Park Aizawl leh LM Store, Bawngkawnah entry fee hi a pek theih bawk.

MFA chuan Mizoram chhim leh hmar chhak leh thlang veng/khua hrang hrang te tel ṭheuh turin turin a sawm a, team tel pawh an ṭhahnem ngei turah a ngaih theih.

MFA-in veng/khua inelna a buatsaih hnuhnung ber chu LBS All Mizoram Inter Village Football Tournament 2022 kha a ni a, Covid-19 zawh hnua inelna buatsaih a nih bawk avangin Mizoram pum a deng chhuak hneh hle.

Inelnaah hian team 204 telin June 24-July 19, 2022 inkar khan neih a ni a, inkhel vawi 203 awmin goal 1,016 a lut. Aizawl District chuan team thawh hnem berin team 103 an thawh a, Mamit-in team 26 zet an thawh ve bawk. Kolasib (19), Serchhip (15), Saitual (13), Champhai (8), Khawzawl (8), Lawngtlai (6), Hnahthial (3), Lunglei (2) leh Siaha (1) ten team an thawh vek bawk.

Aizawla neih inelnaah Aizawl khaw team pahnih an final a, Champhai Kanan chuan Sialhawk hnehin champion nomawi an chawi a; Champhai Kanan player ṭhahnem takin eizawn nan football an hmang zui a ni.