An ramah Osaka inkhel thei dawn lo

Tennis star Naomi Osaka chu a hnungzang na vangin a chawl mek a, kar leh maia khelh tur Japan Open-ah a inlan thei dawn lo, a pianna ramah inelna a hmachhawn ve thei dawn lo tihna a ni.

Grand Slam vawi li champion tawh Osaka hi a hliam vang hian China Open aṭang pawhin a lo inhnukdawk tawh a, season tawp lamah beiseina nei sang ve leh deuh mah se hliam vangin a buai leh ta zawk.

Japan Tennis Asso-ciation chuan thuchhuah siamin, "Hliam vangin Naomi Osaka a lo inlan thei dawn lo," an ti. Osaka pawhin a hliam vanga a inkhel thei lo chu hrehawm a tih thu social media lamah a tarlang ve bawk a ni.

Fa neih vanga a kum khat chuang a chawlh reng hnuah kumin January thla aṭang khan Osaka hi a inkhel ve leh ṭan a, mahse tun hma lama a ropuina ang kha chu a la nei let thei rih lo, kum 26 mi chauh a la nih avang erawh chuan hma hun thui tak a la nei.