Hwang fiamtu match 10 atan hrem

Serie A club Como centre back Marco Curto chu Wolverhampton Wanderers forward Hwang Hee-chan laka a chet dan avangin match 10 atan hrem a ni - Curto hi match nga a inlan thei dawn lo a, kum hnih chhunga chi inthliarna lam hawia thubuai a nei leh a nih chuan match nga dang hrem lehnghal a ni ang.

Nipui lai khan pre-season match-ah Como leh Wolves an inkhel a, he inkhelah hian Curto hian South Korean forward Hee-chan hi "Jackie Chan emaw a inti a nih hi," tiin a sawi a, hei hi Wolves leh Hee-chan te hian hrethiam loin, chi inthliarna lam hawia cheah an puh.

Wolves hian Italian Football Association leh UEFA hnenah lungawi lohna thlen mah se ngaihtuah a ni lo a, UEFA hian an hnuaia match khelh a nih loh avangin thil thleng chu an thuneihna piaha thleng a nih thu an sawi.

Korean Football Association lam lo lang ve vatin, thil thleng hi FIFA hnenah an thlen a, football khawvela thuneitu sang ber hian thutlukna hi an siam ta a ni.

Kum 25 mi Curto hi FIFA chuan vantlang tana thil ṭha tia hnathawk turin thu an pe bawk a, hei bakah hian FIFA pawmpui hnuaiah nungchang a zir bawk ang - Curto hi Como tan a khel tawh rih lo a, Serie B club Cesena-ah loan-in a khel mek.

Wolves director of football operations and administration Matt Wild chuan, "Curto hremna hi football leh vantlang nunah chi inthliarna hi pai dam a ni dawn lo tih chiang taka tilangtu a ni," a ti a, FA leh FIFA chungah lawmthu sawiin, Wolves chuan chi inthliarna lam hawi a do zel tur thu a sawi bawk.