Chawlh kar tawp vawi khat lek pawh Premier League a awm loh chuan English football ngainatute lung a leng hman ṭhin. Tunah chuan kar laihawl inkhel en tur a awm dawn, zanin dar 1:00 hian Arsenal chuan Nottingham Forest an luhchilh dawn a ni.
Season hmasa khan City Ground-ah hian Arsenal an chesual, striker Taiwo Awoniyi-a goal khat hmangin Forest 1-0 in an chak a nih kha - Gunners tan Premier League beiseina a thamral, kuminah Mikel Arteta naute tan chetsual a rem tawh lo ang.
Nomawi a hla?
Arsene Wenger-a hoa Premier League nomawi an chawi aṭangin ṭhangkhat lian zet a liam tawh a, FA Cup lak chang nei mah se an duh tak chu league nomawi a ni - Arteta hoin season hmasa khan an ban phak teuh hle.
Spanish manager hian champion si loa league hmahruai rei ber record a siam pui a, mahse nomawi a ken tel miau loh avangin awmzia a awm lo. Nipui bazarah sum an hmang zui a, champion an tum hle - tunah erawh rinkai ber an ni rih lo.
Champion lai Manchester City bakah hmahruai mektu Liverpool an phak lo, an hnuaia awm Aston Villa nen an point a inzat. Villa hi an duh loha an ban hnu Unai Emery enkawl kha an ni, tun dinhmunah chuan Gunners hi hawi sang thei an ni rih lo.
Season tluana chet ṭhat reng a harsa a, tlak hniam ve deuh lai hi team tin hian an nei ṭhin - Arsenal hian chutiang chu an tawng tawh. An match hnuhnungah erawh Crystal Palace an sawp thei, chesual nawn loa an kaltluang chho a nih chuan City leh Reds umphak turin kawng a la inhawng zau.
Rice leh Partey
An harsatna chingfel turin Declan Rice an lei a, an neihsa Thomas Partey chu hliam vangin a chawl leh vang vang thung. Gunners training thlalak hnuhnung berah chuan Partey hian training a zawm pangngai tawh, chhawr theihin a awm tawh tihna.
Partey a dam lai hian Rice chu a dinhmun a chiang lo thung - Palace an hneh ṭumin Rice hi malpui hliam vanga lak chhuah a ni a, nimin tlai thleng kha chuan a dinhmun a la chiang lo. English chanchinbu ṭhenkhat chuan Rice hian Forest a hmachawn theih tur thu an ziak.
Malpui hliam vanga hun rei tak chawl tawh Partey hi minute 90 chhung inkhel tur chuan a la rintlak loh deuh mai thei. Rice a rem lo a nih pawhin Jorginho an la nei tho a, buaina an tawk lo tura ngaih a ni - an buai theihna chu goal khung tur lam zawk niin a lang.
Gabriel Jesus leh Eddie Nketiah ten goal khung an harsat, inkhel thunun tlat chunga goal khung an harsat ṭhin hi an buaina a ni. Arteta-a'n engtiang takin nge a hma lam a rem dawn hriat a chakawm tawh hle - Jesus pawh a dinhmun a nghet bik lo.
Martinelli inpeih
Goal khung harsat vanga an buai hnuah Arsenal hian Palace lakah goal nga an khung thei. Mahse, Premier League goal khung hnem ber Alan Shearer-a'n Arsenal buaina chu 'striker' a la ni reng tih a sawi, a thusawi pawmpuitu an tamin a rinawm.
Arteta-a'n tlarhma lam a an ṭhat dan ber a la hre fuh lo emawni tih mai tur a ni. Leandro Trossard bul ṭan tirin a khel chhe lo, bench aṭanga lut Gabriel Martinelli-a'n goal hnih a khung lehlawi si - a tu zawk nge mual sir lama a hman chhunzawm ang rinthiam a harsa.
Bukayo Saka pawh hi malsawmna a nih rualin buaina thlentu a ni ve thei bawk. England international hi a dam a nih chuan Arteta-a'n a thlak ngai lo, a khelh ṭhat tawk loh ni pawhin hmun a chang ṭhin si - manager rinna hi Saka hian thil tih hmanga a chhanlet a ngai.
Thlasik bazar lai a ni a, tuna a lan dan chuan North London club hian striker man tam leh hriam tak hel lai an nei lem lo, tuna an neihsa hian season an hmang zui dawn niin a lang. Arteta-a'n a neih sa a hman thiam mai a ngai dawn tihna a ni.
