Australia an chak nuamsa

Asian Cup 2023-ah Australia-in quaterfinal lut turin harsatna an tawk lo a, Pathianni zan khan Indonesia 4-0 in an hneh. Inkhel dangah Tajikistan leh UAE te hun pangngaiah 1-1 in an inhnehtawk a, penalty shootout-ah Tajikistan 5-3 in an vannei.

Socceroos hi January 1, 2006 aṭangin Asian Football Confederation hnuaiah an inziaklut ṭan a, kum 2007 khan Asian Cup-ah tel nghal mah se quarterfinal-ah Japan hneh loin an tla.

Kum 2011-ah Australia hian final an lut a, Japan hneh loin pahnihna an ni. Kum 2015-ah Socceroos hian Asian Cup hi thlengin nomawi an chawi bawk. A tawi zawngin Australia hi team ṭha zinga mi an ni ziah a, inelna hnuhnung berah erawh UAE hneh loin quarterfinal an tla.

Tun ṭumah pawh Australia hian harsatna nei loin quarterfinal an lut a, mahse kum hmasa lam ang thoin semifinal thlen a harsa dawn. Socceroos hian quarterfinal-ah zanin dar 9:30-a Saudi Arabia leh South Korea inkhela chak zawk an hmachhawn ang.