A chung berah Girona awm leh phawt!

Real Madrid leh Barcelona te thawm a na a, manager nei ṭha Atletico Madrid an la awm cheu bawk - team ṭha pathum karah hian Girona chuan La Liga hma an hruai thei tlat.

Pathianni zan La Liga inkhelah Girona hian minute 20-naa Portu-a goal khung hmangin Celta Vigo chu 1-0 in an hneh a, league match 22 aṭanga point 55 hmuin Spanish football inelna sang berah hian hma an hruai.

Real Madrid chuan Inrinni zan khan Las Palmasa 2-1 a hnehin table chung ber an lo luah. Mahse, Girona an chak leh takah chuan match khata khel tlem zawk Real Madrid hi pahnihnaah an awm leh ta rih.

Girona coach Michel chuan, "Hei leh chen hi ṭha takin kan kal tawh a, a chhawm nun zel dan kan ngaihtuah tur a ni ang. Ka naute hian an hna an hrechiang em em vek, a pawimawh ber chu point thum hmuh hi a ni," a ti.

Inkhel dangah Samuel Lino leh Memphis Depay te goal hmangin Atletico Madrid chuan Valencia 2-0 in an hneh a, pathumnaah an awm. Barcelona nen point 44 ve ve hmu mah se Atletico hian goal difference an nei ṭha zawk.