East Bengal hun a inher chhuak ve ta

Kalinga Super Cup-ah East Bengal hun a inher chhuak a, Pathianni zan khan mual neitu Odisha FC chu extra time-ah 3-2 in an hneh. Kolkata club-in Super Cup nomawi an vawi khat chawina a ni a, East Bengal hi 2024–25 AFC Champions League 2 preliminary stage khel turin an tling.

Final-a chakna goal khungtu East Bengal captain Cleiton Silva-a'n tun inelnaah goal nga khungin top scorer a ni a, Mizo tlangval Isak Vanlalruatfela chu best player-a thlan a ni. Odisha FC goalkeeper Lalthuammawia chu best goalkeeper-a thlan a ni a, mimal lawmman hian cheng nuai 2.5 a keng tel.

Final hmuhnawm chu

East Bengal bul ṭantu zingah Mizo an awm lo a, Odisha lamah goalkeeper Thuama bakah Isak, Jerry Lalrinzuala leh Lalṭhathanga (Puitea) ten bul an ṭan. Kolkata club lamin 4-4-2 formation an hmang a, Odisha lamin 4-3-3 an hmang thung.

Ṭan phat aṭangin inkhel a nung a, Odisha keeper Thuama a inringtawk hle. Roy Krishna-a'n Odisha ṭantute tan auna tur siam mah se a ball pet chu goal pawnah chiah a kal.

Roy Krishna leh Stephen te thawhrah ṭha zet chu Mauricio-a'n hnai tak aṭangin goal-ah a chantir thei lo. East Bengal pawhin chance an nei tho a, Mizo keeper Thuammawia a che ṭha takzet.

Odisha striker Mauricio-a'n a theihna a lantir ta a, minute 39-naah Krishna ball pek chu box chhungah chiang zetin a pet goal. First half-ah Kalinga Warriors 1-0 in hma an hruai a, goalkeeper Thuammawia a thlawhhlawk.

Second half-ah East Bengal-in India aiawha Asian Cup khel Lalchungnunga leh Naorem Mahesh te an luhtir nghal a, an tlarhnung a phui phah bakah an goal nawr a nat phah.

Minute 51-naah Mahesh-a ball pek chu Nandhakumar-a'n a khung. hemi hnu lawk hian Serigne Fall-a'n penalty a chawi. East Bengal tan Saul Crespo-a'n penalty aṭangin minute 62-naah hmahruaina goal khung. Hemi hnu lawk hian Fall hian yellow card vawi hnihna a hmu a, hnawhchhuah a ni. Odisha 10-in a khelh a ṭul phah.

Mipui puihnna nen Odisha-in na takin an nawr a, goal hmaah Mauricio a hlauhawm chhunzawm zel. Mahse, East Bengal counter attack-ah an hlauhawm a, PV Vishnu-a'n ṭum hnih chance ṭha a nei a, keeper Thuammawia'n a hna a tlin tlat.

Injury time-ah player 10-a khel Odisha tan Mauricio-a'n penalty a hlawh chhuak ve leh thung a, Ahmed Jahouh-a'n siphurh sutna goal a khung. Hun pangngaiah 2-2 in inkhel a tawp a, inkhel boruak a sang hle.

Kum 12 hnuah

India rama club ngelnghet ber zinga mi East Bengal hian kum 12 chhung chu nomawi lian tham an chawi tawh lo a, final-ah pawh Odisha aiin an tuihal zawk tih an pholang.

Extra time ṭantirhah East Bengal goal bawh a na nghal a, Souvik-a'n crossbar an pet per nghal dawp. Mahse, midfielder thawkrim Souvik hi yellow card vawi hnihna a hmuh avangin hnawhchhuah a ni a, player 10 ve vea an khelh leh tak avangin dinhmun ṭha zawk an awm tawh lo.

Team pahnihin chance an inneih chhawk a, Odisha winger Isak-a'n champion-na goal khung theihna hun ṭha a bawhpelh. Minute 111-naah East Bengal captain Cleiton Silva-a'n defender Narender-a ball chan lai chhuhsakin goal-ah a pet zui nghal a, chakna goal a ni zui bawk.

Red and Gold hian 2012 Federation Cup an champion hnuah nomawi an chawi leh ta. Kum 12 liam ta khan Siliguri-ah Dempo SC chu extra time-ah 3-2 in an hneh a, hun rei tak an nghah hnuah nomawi an nghak chhuak. Kolkata club tan nomawi hlu bik a ni.