Man United chak danah inchhuanna tur a awm lo

Pathianni zan khan Manchester United-in FA Cup fourth round-ah Newport County 4-2 in an hneh. Erik Ten Hag-a hote khingpui hi League Two club an ni a, second half-ah minute 20 chuang hret 2-2 a nih bawk avangin Man United tan an chak danah inchhuanna tur a awm lo.

Bul ṭan ṭha

Man United-in thlasik chawlh an hmang zo a, an rawn kir meuh chuan bul ṭantu zingah Casemiro, Lisandro Martínez leh Luke Shaw te an awm. Ten Hag-a'n player ṭha a luhtirah a ngaih theih a, goalkeeper Andre Onana aiah Turkish keeper Altay Bayindir a lut thung.

Mihkhual team hian nung takin inkhel bul an ṭan a, minute sarihna lekah Alejandro Garnacho hnathawh rah chu Bruno Fernandes a seng nghal. Goal khatna hi mual vei lam aṭangin an nawr a, minute 13-naah mual dinglam aṭangin an nawr thung. Diogo Dalot-a pass chu rawlthar duhawm Kobbie Mainoo-a'n a khung.

Beisei loh thil

Man United-in goal an khung ṭeuh turah a ngaih theih a, mahse an chance ṭha dang an hlah. Rin lawk ang ngawtin thil a thleng lo. Minute 36-naah Bryn Morris-a'n box pawn aṭangin Newport tan a khung a, goal ṭha bik a ni a, keeper Bayindir dem theih a ni lo.

Newport ṭantuten thil mak an hmu zui, minute 47-naah Will Evans hmangin siphurh an sut zo. Hetah chiah chuan mualneitu ṭantute pawh an pawr ta. "Naktuk zingah an ban dawn che," tiin Newport ṭantuten Ten Hag an au el.

Siphurh suttu Evans hi kum 26 mi a ni a, kum 2022 aṭangin professional football a khel chauh. Hemi hma chuan amateur football a khel a, bawng a vulh ṭhin. Millionaire rual Man United player-te tan chuan mualphona tam a tling.

Hei le, Antony

Man United-in manto taka an lakluh Antony a rawn inlar a, minute 68-naah hmahruaina goal a khung. Luke Shaw-a'n ṭha zetin box chhungah petna tur khawp a insiam a, English left back ball petin goal ban per mah se a per chu Antony-a'n goal-ah a khung nghal.

Antony hian Fernandes-a goal khung a siamsak tawh a, Rasmus Hojlund-a goal khungah pawh a inrawlh. Brazilian forward 'penatration pass' ṭha chu midfielder Mainoo-a'n keeper pet per nan hmang mah se a per chu £72m man Hojlund-a'n chiang takin a khung.

Fel lo a awm

Man United-in League Two club Newport an hneh hram a, Ten Hag leh a hoten tan insiamṭhatna tur a la tam hle tih a lang. Dutch manager Ten Hag chuan, "Chance kan insiam ṭeuh laiin anni chuan chance an nei lo," tiin a sawi a, amaherawhchu goal hnih an chhuah miau avangin insiamṭhat ngai a awm tih chu a chiang.

Newport hmachhawn tura zin zingah Marcus Rashford a tel lo a, Ten Hag-a'n club chhung thil ti bawk mah se English forward hi an 'party-na' thlalak a darh. Khawthlang media-te chuan Rashford hi party leh training-naa a kal loh vangin kar hnih hlawh £650,000 a chawi dawn niin an tarlang.

Manchester United hian February 1, Ningani zan dar 1:45 hian Molineux Stadium-ah Wolves an hmachhawn dawn. Premier League-ah Ten Hag-a hote hi pariatnaah an awm mek a, Champions League khel thei china awm Aston Villa chu point 11-in an pha lo.