Inter Milan chakna Martinez

Lautaro Martinez-a goal khat tauh luh hmangin Inter Milan chuan Fiorentina 1-0 in an hneh a, hmahruai lailawktu Juventus tlan pelin tunah chuan Serie A hmahruaitu an ni leh ta.

Pathianni zan Serie A inkhelah Inter Milan hi a tir lamah an hlauhawm, minute 14-naah Martinez chuan Kristjan Asllani-a corner pet chu angle zim zet aṭangin a tauh lut a, an goal venghim tluan zuiin point thum an hlawh chhuak hram.

Simone Inzaghi naute hian vanneihna an mamawh tel, goal a luh hnuah Fiorentina lamin na takin an nawr let - Inter goalkeeper Yann Sommer-a'n hna ngah hle mah se a che sual duh bik miah lo thung.

Minute 76-naah Yann Sommer hian ball kang lai hnek chhuah a tumna lamah M'Bala Nzola a ti palh a - VAR hmanga ennawn a nih hnuin penalty an pe. Penalty pet tura rawn ding chhuak Nicolas Gonzalez-a'n zawite in a pet a, keeper Sommer-a'n a lo man chat.

Inter Milan coach Inzaghi chuan, "Goal kan khung hnuah pawh khung belh theihna remchang kan insiam nual, mahse Fiorentina lam an inveng thiam hle. A nihna takah chuan inkhel chawhnu lama min rawn nawr kha chuan kan buai teuh hle ṭhin bawk.

"Inkhel zawng zawng hi awlsam a awm lo, a pawimawh ber chu chak a ni. Tunah chuan Juventus nena kan inkhelh tur kan ngaihtuah ṭan tawh ang," tiin a sawi a, inbuatsaih ṭhat an mamawh tih a sawi tel bawk a ni.

Inter hian match khata khel tlem zawk chungin Old Lady aiin point khatin an hmu tam zawk. Tun kar tawp hian team ṭha pahnih hi an intawng dawn, Italian champion tur zawnna match pawimawh ber ang hiala sawi theih a ni ang.

Serie A inkhel dangah champion lai Napoli chu Lazio nen goal awm lo 0-0 in an inhnehtawk. Naples club hian point 32 chauh an la neih avangin, season hmasa lama ropui taka an hlawh chhuah Serie A nomawi chu humhim a harsa tawh dawn.