Transfer fee nge pawimawh hlawh?

January transfer a tawp hnai a, tun thlengin transfer lian tia sawi tur a awm lo. Jordan Henderson-a'n Saudi Arabia chhuahsan a, Ajax a zawm ta daih chu ngaihven hlawh zinga mi a ni. Transfer tawp dawn hnaiah transfer lian tham a awm mahna!

Transfer awm apianga sawi hmaih theih loh chu transfer fee a ni a, transfer thleng tur chuan player manah club pahnih an inrem phawt a ngai. Chutihrualin transfer fee ringawt a tawk lo a, club leh player chu hlawh chungchangah an inrem leh a ṭul bawk.

Football fan tam zawk chuan transfer fee hi an ngai pawimawh a, an sawi uar bawk. Mahse, transfer fee ai mahin hlawh hi a pawimawh zawk that.

A chhan chu

Club-in player lei nana transfer fee a pek hian, an pawisa pek chu an 'amortize' a; chumi awmzia chu an pawisa pek zat chu player contract rei zawngin an sem sawm ṭhin. Chuta sum rawn chhuak chu kum khata an pawisa hmanah dah tel a ni.

Player lei nan euro maktaduai 40 an hmang a, kum li daih contract a ziah chuan kum li chhung chu club sum hmanah euro maktaduai 10 an chhut tel ang.

Hei hi Financial Fair Play dan hnuaia club sum chehvel dan enna a ni. A chian lehzual nan, Bayern Munich-in Harry Kane an lak dan hi han thlir ta ila.

German champion Bayern hian Kane hi pound maktaduai 100 bawr velin an lalut a, kum li daih contract a ziak. England captain an leina hi pound maktaduai 25 (amortized amount) zelin an sem sawm. A hlawh hi kar khatah £400,000 vel a ni a, kum khatah chuan pound maktaduai 21.5 vel a hlawh.

Kane aṭanga lang chu a hlawh (£21.5m) leh transfer fee (25m) a inang deuh thuak a, Bayern squad pumpui hlawh chawhrualin nasa takin a pung bawk.

Kane nge Hojlund?

Nipui transfer-a zawhna lian tak chu, Manchester United khan Harry Kane-a lak theiha a awm reng laiin eng vangin pound maktaduai 72-a Rasmus Hojlund an lakluh tih kha a ni.

Man United khan pound maktaduai 30 pek belh kha inhuam ta se, Premier League-a goal khung tam tak khung tawhtu leh tawnrhiat nei ṭha Kane an lakluh theih hmel si a. Chubakah a belhna maktaduai 30 chu 'amortized' hnuah phei chuan kum khatah pound maktaduai 6-7 chauh a ni dawn.

Uluk lehzualin han chik ta ila. Man United-in pound maktaduai 72-in Rasmus Hojlund an lalut a, kum nga daih contract an ziahpui. Amortized transfer fee chu pound maktaduai 14 bawr vel a ni.

Mahse maw, Hojlund-a hlawh hi Kane-a hlawh hmun ngaa ṭhena hmun nga vel chauh a nih avangin kum khatah pound maktaduai 4.5 hlawh ang a ni thung. Tichuan, kum khata Man United-in Hojlund atana an pawisa sen zat chu pound maktaduai 18.5 vel a ni.

Harry Kane erawh amortized tranfer fee £25m a ni a, kum khata a hlawh £21.5m niin a belkhawm chu £46.5m a ni ta daih. Kum khat ringawta a inthlauhna hi £28m a ni a, heta £17m hi hlawh a nih laiin transfer fee chu £11m chauh a ni. Hei hian hlawh pawimawhna a sawi lang.

Kum li hnuah Bayern Munich-in striker dang an zawn a ṭul thei a, Man United erawhin kum 10 chhunga chhawr theih tur striker an nei thei thung. Mahse, hei hi chu pakla hisap ang chauh a ni.

Chutihrualin Kane hi Man United-in lalut ta se, Premier League emaw Champions League emaw champion hial an beisei thei a, football-ah chuan suma sawifel theih loh tam tak a awm tih hriat a ṭha.

Chelsea chungchang

Chelsea-in sum an hmang nasa a, football ngainatute bakah a zirchiangtute pawhin mak an ti. Tun season-ah ringawt pawh Moises Caicedo, Romeo Lavia, Christopher Nkunku, Nicolas Jackson leh Cole Palmer te chu an player lak langsar zual an ni.

Todd Boehly-in neitu nihna a chelh hnuah transfer window ṭum thumah Chelsea hian euro tluklehdingawn khat chuang an hmang. Engtin nge Financial Fair Play dan bawhchhe si loin hetiang zat zat sum an hman theih tih hi zawhna a tling.

Blues hian awmze nei takin sum an tichevel tih hriat a ṭha. An hna thawh hmasa ber chu player hlawh hnem ṭhenkhat an chhuahtir a, an transfer fee a tlem deuh a nih pawhin pawi an ti lo.

Saudi leh Caicedo

Chelsea hian Saudi Pro League an hlawkpui a; an player ṭhenkhat Kalidou Koulibaly, Edouard Mendy leh N'Golo Kante te chu Saudi Arabia lamah an kaltir.

Kante hi chu free transfer a ni a, Koulibaly leh Mendy te an hralhna man belh khawm hi pound maktaduai 33 vel a ni. Mahse, hetah pawh hian transfer fee aiin an hlawh an ngai pawimawh tih a lang.

French mifielder Kante hian kar khatah £290,000 a hlawh a, kum khatah £15m a hlawh. Koulibaly hlawh hi a sang leh hret a, kar khatah £295,000 hlawh. Goalkeeper Mendy a hlawh tlem ber a, kum khatah £3m a hlawh. Mahse, heng player pathum hlawh belhkhawm hi kum khatah chuan £35m a ni daih! Transfer fee chhiar tel loh pawhin hetiang zat hlawh pek tur awm ta lo hi, Chelsea tan thawk huaina tham a tling.

Chelsea player lakluh Caicedo hi han thlir leh ta ila, £115m-in an lalut a, kum riat leh a chanve contract an ziahpui. London club-in an leina chu kum khatah £13.5m (amortized amount) chauh a ni. Kar khatah £150,000 vel a hlawh a, chu chu kum khatah chuan £8m vel a ni. Blues hian player pathum Kante, Koulibaly leh Mendy te an chhuahtir avangin Caicedo ang pahnih an lalut thei tihna a ni daih.

Hlawh tam dang

Chelsea hian free transfer-in Cesar Azpilicueta leh Pierre-Emerick Aubameyang te an chhuahtir bawk a, kum khata player pahnih hlawh atana an seng chu £18m a ni.

Azpi leh Auba te hi free-in chhuahtir chhuahtir mah se an hlawh a tam avangin FFP dan zawm kawngah nasa takin an hlawk phah thung.

Barca lam hi...

Hlawh chungchang bawk hi Barcelona-in La Liga FFP dan an bawh kul theihna chhanah a ngaih theih. Catalan club hian Gerard Pique (retired), Jordi Alba leh Serigo Busquets te an chhuahtir zarah player ṭha Ilkay Gundogan, Oriol Romeu,Joao Cancelo, Inigo Martínez leh Joao Felix te an lak theih phah.

Heta lang chiang chu, transfer fee hi a pawimawh rualin player hlawhin nghawng lian tak a nei. Club-in Financial Fair Play dan a zawm theih nan, hlawh hi transfer fee aia pawimawh chang a tam.

January transfer hun a tawp ṭep a, club-in player a lakluh hunah transfer fee a pawimawh rualin hlawh a pawimawh tel tih hriat tel a ṭha hle.