Congo hneh loin Egypt an tla

Afcon champion vawi sarih ngawt ni tawh Egypt chuan beisei an phak lo! Pathianni zan 2023 Africa Cup of Nations last 16 inkhelah Egypt hian penalty shootout-ah DR Congo chu 8-7 in an ngam lo a, an zinkawng a tawp.

Ram pahnihte hun pang-ngaiah 1-1 in an inhnehtawk a, extra time an khelh zawh hnuah pawh goal dang a lut zui lo. Penalty hmanga chak zawk zawn niin, a tawpah Congo goalkeeper Lionel Mpasi-a'n chakna goal a khung.

Egypt an tla

DR Congo hian Afcon last 16 an vawi khat khelhna a ni a, an tan chuan mumang ram a ni. Chawlhlawk hmain Yoane Wissa-a siamsak chu Meschack Elia chuan khungin beisei loh takin hma an hruai a, team ṭha zawk zawk dinhmun a ṭha.

Mohamed Salah tel loa khel Egypt lamin na takin an bei let nghal a, an penalty hmuh chu Mostafa Mohamed-a'n khungin goal dang erawh an nei zui thei bik lo a, extra time an khelh laiin Mohamed Hamdy chu hnawhchhuah niin player kim loa an khelh tluan a ngai.

Penalty hmanga chak zawk zawnnaah pawh ram pahnih an intluk tawk hle, mahse keeper Gabaski-a'n goal kham chungah pet chhuakin a hlah a, a hnua pettu Congo keeper Mpasi-a'n a khung thung.

Pathianni zan inkhel dangah Guinea chuan hun tawp dawna Mohamed Bayo tauh luh hmangin Equatorial Guinea 1-0 a hnehin an tlang ve bawk a, quarterfinal-ah chuan Egypt hnehtu DR Congo nen an inhmachhawn zui leh dawn a ni.

Afcon 2023-ah Egypt-in beisei an phak lo hle, group match hoah chak ni hmel an hmu miah lo - an khingpuite inhnehtawk pui chungin knockout stage an lut. Last 16-ah an tla zui a, chak an nei miah lo tihna a ni - coach Rui Vitoria hma hun a chiang lo nghal.

Vitoria chuan, "Football-ah hi chuan hlim ni leh lungngaih ni hi a awm ṭhin, tunah hian lungngaih ni kan tawng. A chang hi chuan theihtawp kan chhuah a, kan theihna zawng zawng kan hmang chung pawha a tawk zawh loh ṭum hi a awm ve thei a ni," a ti.

Egypt hian an captain Salah chu malpui hliam vangin match hnihnaah an chan a, Liverpool forward bakah hian goalkeeper Mohamed El Shennawy pawh hliam vang bawkin a khel thei lo, an ṭhat dan berin an khel thei lo - chutihrualin ram dang nena khaikhin chu an la ṭha pangngai viau.

Morocco inlan hun

Zanin hian last 16 khelh zawh a ni dawn a, zan dar 10:30-ah Mali leh Burkina Faso an inkhel ang. Zanlai dar 1:30-ah champio tura rinkai Morocco leh South Africa te an inkhel zui leh bawk dawn a ni.

Morocco hi an coach Walid Regragui hoin an inlan thei dawn. Regragui hi group stage lama DR Congo nen an inkhelh ṭumin buaina chhuakah a inhnamhnawih a, hrem ni mah se Confederation of African Football (Caf) chuan hremna hi an sutsak.

A tirah chuan Regragui hi match li chhung a naute inkhel kaihruai thei lo tura hrem a nih bakah pawisa chawitir a ni. Mahse, Moroccan football federation (RMFF) chuan CAF hnena thil thleng ennawn a, hremna hlihsak tura an ngenna chu a hlawhtling a ni.

Kum 48 mi Regragui hian Zambia an hmachhawn ṭum chuan a naute a ho thei lo hman tawh. Assistant coach Rachid Benmahmoud hoin an khel a, zaninah erawh an boruak pawh a ṭha zual tawh ngei tura ngaih a ni.