Goal hnih hum thei lo PSG

Paris Saint Germain chuan Brest lakah goal hnih khung hmasa mah se an hum thei lo, an goal khung zat chiah an chhuah avangin 2-2 a inhnehtawkin point khatah an lungawi a ngai.

Marco Asensio leh France forward Randal Kolo Muani te goal hmangin PSG dinhmun a ṭha hmasa. Luis Enrique enkawl Paris club hi inelna hrang hranga an match hnuhnung parukah an chak vek dawn ni pawhin a lang hman.

Mahse, Mahdi Camara chuan si phurh sut ṭhenin an phur zui - hun tawp dawnah Mathias Pereira Lage-a chuan mawi zetin a thai goal zui a, si phurh an sut zo der. PSG lamin beih let an tum viau a, an ṭang ulh - forward Bradley Barcola chu hnawhchhuah a ngai hial.

Chak zo lo mah se PSG hian Ligue 1 match 19 aṭanga point 44 hmuin hma an la hruai tho a, anmahni hnaih bertu Nice aiin point rukin an sang zawk - champion nomawi humhim leh turin an dinhmun a la ṭha rih hle.

Paris Saint-Germain coach Luis Enrique chuan, "Hun chanve hma lam kha chu duhthusama ṭhain kan khel, goal kan khung bakah hun ṭha vawi tam tak kan insiam thei bawk. Mahse, a hnu lamah kha chuan ball kan hloh nasa takzet.

"Tuna kan result hi inzir nan leh in enfiah nan kan hmang tur a ni ang. League leh Cup inelna kan hmabak a, chumai bakah chuan Champions League kan khel dawn hnai bawk, tun hi harh nana kan hman theih ka beisei," a ti.