Norwich tan Reds an ṭha mah mah

Jurgen Klopp-a'n season tawpa Anfield a chhuahsan tur thu a sawi hnua Liverpool match hmasa berah 5-2 in Norwich an sawp. Reds hian FA Cup fifth round an lut a, Watford emaw Southampton emaw chak zawk an hmachhawn ang.

Pathianni zan FA Cup inkhelah Reds-in attacking football an khel nghal a, an mikhual hi na taka nawrin Darwin Nunez-a'n goal ban a pet per nghal. Reds hian goal pawh an khung hmaa minute 16-naah James McConnell ball vawrhluh tawih zet chu Curtis Jones-a'n a tauh lut.

Norwich-in corner kick hmang ṭangkaiin Ben Gibson hmangin minute ruk hnuah rut sut ve mah se team ṭha zawk danglamna a lang. Minute 28-naah kum 20 mi Conor Bradley hnathawh ṭhat rah sengin Nunez-a'n hmahruaina goal a khung.

Liverpool vannei ni se first half-ah goal tam zawk khung thei an ni a, Cody Gakpo-a'n chance ṭha bik a hlah. Minute 52-naah Norwich defender tihsual hmang ṭangkaiin Diogo Jota-a'n a khung belh a, minute 63-naah Virgil van Dijk-a'n corner kick aṭangin a tauh lut.

Borja Sainz-a'n goal ṭha bik a khung a, Liverpool defender-te dem ai chuan Norwich player hi fak mai a finthlak. Liverpool-in goal hnih chhuah mah se an attack a nat em avangin Norwich tan chelh rual an ni lo a, injury time-ah Ryan Gravenberch-a'n goal ngana a khung belh.

Liverpool boss Jurgen Klopp chuan, "Ka hnuk a ulh dawnin ka hria a, khati lam kha chu ngaihtuah loh ka duh. Fan-te nena kan inkar chu ka hriat sa a ni a, thildang engmah an tih belh ka phut lo. Football-ah chuan kan huaisen a ṭul a, mual sira putar chungah kan rilru a awm tur a ni lo. Tun hi chu ka chawlh tur thu ka puan hnua kan match hmasa ber a ni a, a hnu lamah chuan ngaiah kan ngei thei ang," tiin a sawi.

Reds hian January 31, Nilaini zan dar 1:45-ah Chelsea an mikhual dawn a, Premier League hmahruai mektu Klopp-a hote tan inkhel pawimawh bik a ni ang.