Lalkulhna leh Tlangsiama inchai boruak hre hman chuan Mizoram infiamna huanga thil ropui leh langsar berte zingah an dah. Mi bik, thahrui ngah leh sulhnu nei ṭha Vanlalkulha chu September 3, Inrinni chawhnu dar 2:25 khan a thi.

Lalkulha hi kum 79 mi a ni a, a upat hnuah hrisel lohna hrang hrangin a tlak buak. August 23, Thawhlehni khan Trinity Hospital, Silaimual, Melthumah dah luh a ni, beiseina sang tak nena enkawl ni mah se stroke vangin mual a liam.

North Vanlaiah kum 1944 May 16 khan a piang a, a hun tawp erawh Zemabawk Beraw Vengah a hmang. Nimin September 4, Pathianni chawhnu lam khan vui liam a ni a, a taksa awm tawh lo mah se a sulhnu erawh hriat reng a ni tawh ang.

Lalkulha chu
Hranghleia leh Lalbiakveli te inkarah a piang a, unau 13 an ni. Naupang ṭhang duang leh thahrui ngah a ni a, kum 13 mi a nih chuan ramah hna thawk turin amah chauhin a riak ngam tawh, a nu leh pa ten a tha an chhawr thei hma hle tihna a ni.

"Ka ke a len em avangin thingpui chilah hian min duh ṭhin, tui khura tui chawi tura ka kal te hian min lo huphurh hmel thei lutuk," tiin a sawi fiamthu ṭhin, vawi khatah tui hi ṭin nga ten a chawi thei, tuikawhna hmanga a kawh bakah a khai bawk ṭhin.

6ft 1in a sang a ni a, Mizo pa pailian tak a ni. A taksa a lianin a fuke a hrawl hle - a pheikhawk bun tawk pawh number 11-12 a ni hem mai, a vanglai chuan a awm len zawng hi 43in a ni a, a rih zawng hi 100kg chuang ni mah se infiamna a luhchilh vanglai chuan 85kg a ni.

A vanglai
Mi hriat a hlawhna chu inbuan leh inchai a ni a, heng bakah hian infiamna dang pawh a ti thei hle. Kum 1962 a buatsaih Mizo inbuan Champion, Biate Zone Sports ah leh kum 1963 a buatsaih Serchhip Block Development Sports-ah te 'Best Boy' a thlan a ni.

Mizoram inbuanpui 1964 a neihah chak ber a ni a, hetah hian Mizorama chak inti leh hmingthang chu an kim vek. Kum 1966 khan Athletics Meet Nowgong, Assam-ah a tel a, kum 1964-77 chhung hian inchai, Mizo inbuanaah te a lo chak ber bawk.

Lungdenah ft.39 a deng a, thirtiang khawhah ft.48 a khawh bawk. A vang laiin lenhmui hring thingzai (chartin) ft.12 a sei paruk chu vawi khatah a pu zo a. Buh ṭin riat a phur zo. Kum 1999 khan All India Forest Sports Meet, Lucknow-ah Lungdenah 9.98m dengin pakhatna a ni, veteran record a tling hial.

A nat dan
Kum 2007 aṭang khan zunthlum a nei tih hriat a ni a, kum 2010 a her chhuah phei chuan insulin injection ngaiin a awm hial. Hrisel lohna dangin a tlabuak belh zel, kum 2016 aṭang khan ruhsehpui vangin chet vel pawh a harsat tawh.

TB natnain kum 2018 khan a tlakbuak chhunzawm, heta ṭang hi chuan a pawn chhuak hleithei tawh lo. July 27 khan zunthlum leh BP sang vangin Trinity Hospital-ah dah luh a ni a, kar khat a awm hnuin in lamah enkawl zui a ni.

Mahse, hma a sawn hleitheih loh avangin Trinity-ah bawk dah luh leh a ni. August 23 aṭang kha chuan biak theih a ni tawh lo a, a dam leh beiseiin ICU-ah dah ni mah se, a hun tawp thlengin biak theihin a awm ta lo.

Vanlalkulha Sulhnu Langsar
1962: Mizo inbuan, Biate Zone-ah a champion.
1963: Serchhip Block Development Sport-ah Best Boy a ni a; inbuan, insuknawr, high jump, shotput leh thirtiang khawhah te a champion vek.
1964: Mizoram inbuanpuiah champion lawmman a la. Hemi ṭumah hian Mizorama chak inti leh hmingthang thamte chu an kim hle.
1965: Mizoram inbuanpuiah a champion.
1965: Inchai (Wrestling)-ah Mizoram champion a ni. Amah chotu Biaksanga leh Vankunga, Champhai ve vete chu a hneh ve ve a ni.
1972: Robuanga hnehin Mizo inchaiah a champion.
1975: Vanlalkulha chai thei tur zawn a ni a, Vumzathanga, Tlangdingliana leh Vanlalmawia te an lo chhuak. Tlangdingliana a inhnukdawk a, Vanlalkulha'n mi pahnih hi hnehin a champion.
1977: Tlangsiama nen inchaiin a inhliam a, a inlan chhunzawm theih loh avangin chak loa puan a ni.
1983: Tlangsiama hnehin Mizo inchaiah a champion nawn.