Serena tan US Open a tawp

Tennis player ropui berte zinga mi, inelna lian Grand Slam nomawi ringawt pawh 23 teh meuh chawitu Serena Williams chu US Open third round-ah a chak lo a, ropui taka a inlarna tennis a khelh hnuhnung ber ni tura ngaih a ni.

September 26 hian kum 41 mi a ni tawh dawn a, fa a neih tawh bakah Serena hian hliam a nei fo. US Open khelh hma khan atan tennis khelh chhunzawm a harsat thu a sawi tawh, a chawlh tur thu la sawi fak lo mah se a chawl dawn tih erawh a hriat theih.

Arthur Ashe Stadium-ah Serena inkhel entu an tam ṭhin a, fans lamin 'Player Ropui Ber' tih inziahnate an tarlang hial ṭhin. Mahse, a vanglai a pel tawh miau a, chak reng thei a ni bik lo - Australian nula Ajla Tomljanovic lakah 7-5, 6-7 (4-7), 6-1 in a tlawm.

American player ropui Serena chuan, "Kum 10 mai a ni lo, kum 20 chuang he hmunah hian hun ka hmang tawh. Kha tih hun chhunga min thlawp tlat ṭhin tute chungah ka lawm. Thil engkim bul ṭanna erawh ka nu leh pa te an ni thung.

"Keimah chauha tun dinhmun thleng thei ka ni lo, a nihna takah chuan Venus awm lo se la chuan Serena hi a awm thei kher lo ang," tiin a unaunu Venus chu a hlawhtlinna kawnga mi pawimawh a nih thu a sawi bawk.

Mipa inelna lamah Rafael Nadal a la chak zel. Spanish star hian nimin zing khan Richard Gasquet chu 6-0, 6-1, 7-5 in a sawp. Grand Slam vawi 22 champion tawh hian tualchhung player Frances Tiafoe a hmachhawn leh ang.

Player ṭha dang - world number 4 Carlos Alcaraz leh Andrey Rublev te pawhin an khingpui ve ve an hneh a, anni pahnih hi champion rinkai zinga mi an ni. World number 1 Daniil Medvedev chuan tukin hian last 16 a khel thung a ni.