Real & Barca chak laiin Atletico chak zo lo

La Liga-ah Real Madrid-in duhthusama ṭhain season bul an ṭan a, match li an khelh tawhah an la chak vek - Real hian Inrinni zan khan anmahni ang thoa tlawm la nei lo Real Betis an mikhual a, 2-1 in an lo hneh.

Real tana Vinicius Jr goal hmahruai khung chu Betis tan Sergio Canales chuan chhanglet mah se, Madrid khaw club-in Rodrygo hmangin an khung leh a, league table chung ber an luah chhunzawm.

Barcelona pawhin a zawna match thum an chakna ni turin Sevilla chu khualmualah 3-0 in an hneh a, Raphinha, Robert Lewandowski leh Erik Garcia ten goal khat ṭheuh an khung.

Hetihlai hian Atletico Madrid erawh an chak zo lo a, khualmualah Real Sociedad nen 1-1 in an inhnehtawk - Atletico tana Alvaro Morata goal hmahruai khung chu Sociedad tan Umar Sadiq chuan a sut a ni.

Hei le Madrid
Real leh Betis hi squad enin, team inthlau tak angin lang mah se, Inrinni zana an intawn hma khan team pahnih hian league match thum ve ve an khel tawh a, vawi thum ve ve an chak avangin intum tawk viau tura ngaih an ni.

Santiago Bernabeu-ah Real-in mualneitu zia an chhuah a, Vinicius Jr chuan minute kuana lekah goal hmahruai a khung - Real hlim chhung erawh a rei lo. Minute riat hnu lawkah Canales chuan si phurh a rawn sut a, Betis-in chak an beisei ngam.

Mahse, Real tan Rodrygo chuan minute 65-naah goal a khung leh a, Madrid an chak - Betis tan Canales bawkin hun ṭha a nei a, Real si ban nghakin Thibaut Courtois kher ding lo se si phurhna goal a khung ngei ang!

Hetihrual hian Real chance neih zozai sawi bo a rem bik lo. 1-1 a nih laiin Karim Benzema-a goal khung ngei tur nia lang chu goal line aṭangin petchhuah sak a ni a, Rodrygo chuan 2-1 a nih hnuah uiawm takin post a pet per bawk - Thawhlehni zan dar 12:30-ah Celtic lenchilhin Real hian Champions League season bul an ṭan zui ang.

Mangṭha mangchhia
Barca-in an hun thim tawn chu an mangṭha mek zel a, tun season-a an league match hmasa berah draw result nei mah se a zawna a vawi thum nan an chak a, Sevilla lakah 3-0 in hnehna an chang.

Catalan club tan pound maktaduai 60 man Raphinha chuan minute 21-na lekah goal hmahruai a tauh lut a, Robert Lewandowski chuan minute 36-naah Jules Kounde siamsak chu a awma la thlain, ṭha zetin a khung bawk.

Kum 34 mi Lewy hian tun season-a league match li a khelhah goal nga a khung der tawh - Barca hian an la duhtawk mai lo. Sevilla aṭanga Barca pantu Kounde siamsak bawk chu Erik Garcia chuan goal-ah a chantir a, 3-0 in an chak.

Sevilla erawh an hmabak a ko ta hle - tun season-a league match li an khelh aṭangin point khat chiah an nei a, Thawhlehni zan dar 12:30-ah Champions League khelin Manchester City an mikhual zui ang - Barca chuan Nilaini zanah Viktoria Plzen an mikhual dawn thung.

Atletico hi
Diego Simeone hoin Atletico Madrid-in beisei an phak thei lo - tluk leh din an awm a, Valencia an hneh hnu lawkah Real Sociedad chu 1-1 in an inhnehtawkpui leh ta.

Atletico tan Morata chuan minute ngana lekah goal hmahruai a khung a, mahse, Sociedad tan Almeria aṭanga an lakluh thar Sadiq chuan si phurh a sut a, Atletico an hawihai.

Simeone chuan Antoine Griezmann chu bench aṭangin a luhtir a, mahse, khelmual a luh hian minute 27 chiah a awm tawh - French forward hian tun season-a Atletico match 50% a khelh chuan season tharah Atletico hian euro maktaduai 40-in an lei a ngai.

Mahse, 45 minutes a khelh tlin chauhin match a khelhna chu match tlinga chhiar tur a ni a, tun season-a league match liah Griezmann hi 64, 62, 75 leh 63 minute-ah luhtir a ni - Atletico hian Nilaini zanah Champions League match khel turin Porto an mikhual ang.