Mbappe leh Messi an vul

Kylian Mbappe-a'n goal hnih a khung a, a siamsaktu chu Lionel Messi ve ve a ni. Paris St-Germain chuan Mbappe bakah Tavares Mendes te goal hmangin Nantes chu 3-0 in an hneh.

Mualneitu Nantes defender Fabio chu minute 23-na lekah hnawh chhuah a ni a, goal tam zawk an phur lo kha an vannei. Chutih rualin PSG lamin Thawhlehni zana Juventus nen Champions League an khelh tur an ngaihtuah tel a, nuamsa angreng takin league match an khel.

Barcelona captain hlui Messi-a'n tun season Ligue 1 bikah goal thum khungin assist vawi ruk a nei tawh, forward Mbappe nen an inkawp rem hle. France international hian kum 2022 bikah league goal 26 a khung a, heng zinga 10 chu Messi siamsak a ni.

PSG coach Christophe Galtier-a'n league chauh a ngaihtuah lo, season kal laia a player hlauhawm ber tia sawi ngam Neymar chu bench lamah a hahchawlhtir hmasa - Old Lady nen UCL an khelh hunah erawh Brazil international hian bul a ṭan leh tawh ang.

Paris club hian league match ruk aṭangin point 16 an hmu a, table hmahruaitu an ni. An dinhmun erawh ṭha tak a ni bik rih lo, pahnihna Marseille chuan Auxerre 2-0 in an hneh ve tho a, an point hmuh zat a inang a ni.